وزيراعظم ۔ چيف جسٹس ملاقات اعلامیہ

سپریم کورٹ نے وزیراعظم کے چیف جسٹس سے ملاقات کا علامیہ جاری کیا ہے جس کے مطابق چیف جسٹس نے وزیراعظم کو یقین دلایا ہے کہ عدلیہ اپنی آئینی ذمہ داریاں آزادانہ، غیر جانبدارانہ شفاف اور کسی خوف و مفاد کے بغیر قانون کے مطابق پوری کرنا جاری رکھے گی ۔
پاکستان ۲۴ کے مطابق چیف جسٹس ثاقب نثار سے وزیراعظم شاہد خاقان عباسی کی دو گھنٹے جاری رہنے والی ملاقات کے اختتام پر عدالت عظمی کے اعلامیے میں کہا گیا ہے کہ وزیراعظم نے چیف جسٹس کو آگاہ کیا کہ مشترکہ مفادات کونسل نے واٹر پالیسی کی منظوری دی ہے جو چیف جسٹس کے اس ضمن میں کی گئی کوششوں کے ثمرات لانے میں مدد کرے گی ۔ اعلامیے کے مطابق وزیراعظم نے چیف جسٹس کو عدالتی اصلاحات کے لئے اٹھائے گئے اقدامات میں تعاون کی یقین دہانی کرائی ۔ وزیراعظم نے چیف جسٹس کو فیڈرل بورڈ آف ریونیو کے عدالتوں میں زیرالتوا مقدمات سے آگاہ کیا جس سے ٹیکس اور مالی معاملات کے مقدمات میں مشکلات کا سامنا ہے، چیف جسٹس نے کہا کہ وہ اس معاملے کو دیکھیں گے اور اس کے فوری نمٹانے کے لئے اقدامات کریں گے ۔