انڈین انٹیلی جنس نے سائبر حملے کیے: پاکستانی فوج

Reading Time: < 1 minute

پاکستان کی فوج نے کہا ہے کہ انڈین انٹیلی جنس کی جانب سے پاکستان کے سکیورٹی اور حکومتی اداروں سے منسلک افراد کی معلومات ہیک کر کے دھوکہ دینے کی کوشش کی گئی ہے جس کی نشاندہی ملکی انٹیلی جنس ایجنسی نے کی۔

فوج کے شعبہ تعلقات عامہ کی جانب سے جاری کیے گئے بیان کے مطابق انٹیلی جنس کے محکمے نے انڈین سائبر حملوں کے خطرے سے خبردار کرتے ہوئے تمام حکومتی اداروں کو ایڈوائزری جاری کر دی ہے۔

آئی ایس پی آر کے بیان میں کہا گیا ہے کہ تمام سرکاری اداروں کو سائبر سیکیورٹی بڑھانے اور ممکنہ حملوں کی نشاندہی کرنے کی تاکید کی گئی ہے۔ 

 بدھ کو جاری ہونے والے بیان کے مطابق حساس اداروں نے انڈین انٹیلی جنس ایجنسی کی جانب سے بڑے سائبر حملوں کی نشاندہی کی ہے۔

بیان میں کہا گیا ہے کہ انڈین انٹیلی جنس نے سائبر حملوں کے تحت پاکستانی سول اور عسکری عہدیداروں کے ذاتی موبائل اور تکنیکی آلات ہیک کرنے کی کوشش کی ہے۔