وینا ملک کی والدہ نے اسد خٹک کو پانی کی بوتل دے ماری

راولپنڈی کی مقامی عدالت میں بچوں کی حوالگی کے مقدمے میں وینا ملک کی والدہ نے پانی کی بوتل اپنے سابق داماد اسد خٹک کو مارنے کی کوشش کی مگر پولیس کی مداخلت کے باعث ان کا نشانہ چوک گیا۔

پولیس وینا ملک اور ان کی والدہ کو موقع سے لے گئی۔ جس وقت بوتل پھینکی گئی اسد ملک کیس سے متعلق میڈیا ٹاک کر رہے تھے۔

قبل ازیں ڈسٹرکٹ اینڈ سیشن کورٹ راولپنڈی میں اداکارہ وینا ملک کے بچوں کی حوالگی کے کیس کی سماعت سول جج راجہ فیصل رشید نے کی.

وینا ملک کے سابق شوہر اسد خٹک عدالت میں پیش ہوئے تو جج نے پوچھا کہ وینا ملک صاحبہ کہاں ہیں؟
وینا ملک کے وکیل نے بتایا کہ وہ راستے میں ہیں، عدالت آ رہی ہیں.

عدالت نے اداکارہ وینا ملک کے آنے تک سماعت میں وقفہ کیا.

وقفے کے بعد جب وینا ملک عدالت پہنچیں‌تو راولپنڈی پولیس نے صحافیوں کو کمرہ عدالت میں جانے سے روک دیا اور کہا کہ پہلے جج سے اجازت لی جائے گی.
عدالت میں وینا ملک کی جانب سے بیٹے کو پیش کیا گیا جبکہ بیٹی کے بارے میں بتایا گیا کہ ان کی طبیعت خراب ہے.
عدالت نے مقدمے کے گواہان کی حاضری لگائی اور ڈیوٹی جج کی جانب سے اسد خٹک کو بچوں کا تین ماہ کا خرچہ ادا کرنے کا حکم دیا گیا.
عدالت نے ہدایت کی کہ اسد خٹک بچوں کے علاج معالجے کے اخراجات بھی ادا کریں.