موجودہ اسٹیبلشمنٹ کے تحت الیکشن کا عملی فارمولہ پیش کر دیا: فواد چوہدری

Reading Time: < 1 minute

تحریک انصاف کے رہنما فواد چوہدری نے کہا ہے کہ عمران خان نے ملک کے سیاسی مستقبل اور جمہوریت کی بحالی کا ایک عملی فارمولا پیش کیا ہے۔

منگل کو ایک بیان میں اُن کا کہنا تھا کہ اس فارمولے پر آگے بڑھنے کی ضرورت ہے کیونکہ ملک کی اقتصادی حالت مزید سیاسی عدم استحکام کا بوجھ نہیں اٹھا سکے گی۔

فواد چوہدری کے مطابق انتخابات کرانے کے لیے اسٹیبلشمنٹ کا موجودہ اسٹیٹس کو Status Quo برقرار رکھا جا سکتا ہے۔

قبل ازیں تحریک انصاف کے چیئرمین عمران خان نے کہا تھا کہ وہ نئے آرمی چیف کا تقرر مؤخر کرنے کے حق میں ہیں۔

نجی ٹی وی چینل دنیا نیوز کو ایک انٹرویو میں عمران خان کا کہنا تھا کہ جنرل قمر جاوید باجوہ کو مدت ملازمت میں توسیع پر وہ کچھ نہیں کہتے مگر ایسا انتظام کیا جا سکتا ہے کہ اگلی حکومت آ کر فوج کا نیا سربراہ تعینات کرے۔

پی ٹی آئی کے چیئرمین نے کہا کہ وہ توہین عدالت کے مقدمے میں معافی مانگنے کے لیے تیار ہیں اور اگر ہائیکورٹ اُن کو روسٹرم پر بولنے کی اجازت دے دیتی تو وہ معافی مانگ لیتے۔

انہوں نے کہا کہ وہ الیکشن سمیت ہر ایشو پر بات چیت کے لیے تیار ہیں۔