مارگلہ ہلز کے ٹریل فائیو پر دو دن سے لاپتہ15 سالہ طالبعلم کی لاش

Reading Time: < 1 minute

اسلام آباد پولیس نے کہا ہے کہ سنیچر کو لاپتہ ہونے والے 15 سالہ لڑکے طٰحہ کی لاش مارگلہ ٹریل پر ایک گہری کھائی سے مل گئی ہے۔

پیر کو اسلام آباد پولیس کی جانب سے جاری بیان میں کہا گیا ہے کہ لاش کو خطرناک کھائی سے نکالنے کے لیے انتظامات کیے جا رہے ہیں۔
ایس پی سٹی اور سرچ ٹیم بچے کے لواحقین کے ہمراہ موقع پر موجود ہیں۔

سنیچر کو مارگلہ ہلز کے ٹریل فائیو پر 15 سالہ طالبعلم طٰحہ اپنے دوستوں کے ہمراہ گیا تھا جس کے بعد وہ لاپتہ ہو گیا تھا۔

اسلام پولیس کے مطابق ’بظاہر معلوم ہوتا ہے کہ نوجوان راستہ بھٹک گیا تھا اور پاؤں پھسلنے سے کھائی میں گر گیا۔‘

پولیس نے کہا ہے کہ مزید تفتیش کے لیے لاش کا پوسٹ مارٹم کروایا جائے گا تاکہ تمام پہلوؤں کا احاطہ کیا جا سکے۔
’تفتیش کے دائرہ کار کو وسیع کرتے ہوئے مختلف افراد سے بھی پوچھ گچھ کی جا رہی ہے۔ کیس کے دیگر پہلوؤں پر بھی تفتیش عمل میں لائی جا رہی ہے۔‘

پولیس کو محکمۂ فارسٹ اور ماحولیات کے اہلکاروں نے لاش کی نشاندہی کی تھی۔

اسلام آباد پولیس نے سرچ آپریشن کے لیے کوئیک ریسپانس ٹیم، مارگلہ فٹ پیٹرول اور ڈرون کیمروں کی مدد لی تھی۔