عمران خان اور بشریٰ بی بی کو جیل میں سحری نہیں دی جا رہی: تحریک انصاف

Reading Time: < 1 minute

پاکستان تحریک انصاف نے دعویٰ کیا ہے کہ اڈیالہ جیل میں قید پارٹی کے بانی عمران خان اور اُن کی اہلیہ بشریٰ بی بی کو رمضان میں سحری نہیں دی جا رہی۔

منگل کو پشاور میں صوبائی حکومت کے ترجمان بیرسٹر سیف نے ایک بیان میں کہا کہ عمران خان سے ملاقاتوں پر پابندی کا مقصد رمضان میں اُن کو اذیت دینا ہے۔

بیرسٹر سیف کے مطابق اطلاعات ہیں کہ عمران خان اور بشریٰ بی بی کو سحری و افطار میں کچھ فراہم نہیں کیا جا رہا۔

بیرسٹر سیف کے بیان میں کہا گیا ہے کہ دونوں کو مجبوراً نہار منہ روزہ رکھنا پڑ رہا ہے۔

بیرسٹر سیف نے الزام عائد کیا کہ دونوں کو عبادات سے بھی روکا جا رہا ہے۔

ان کا کہنا تھا کہ جعلی حکومت کے اوچھے ہتھکنڈوں کے باعث عوام میں شدید تشویش پائی جاتی ہے، جعلی حکومت ایک قیدی سے خوفزدہ ہے۔

بیرسٹر سیف نے کہا کہ ملاقاتوں پر پابندی عدالتی احکامات کی کھلم کھلا خلاف ورزی ہے۔

انہوں نے کہا کہ عدالت کو 26 ویں آئینی ترمیم کی زنجیریں توڑ کر توہینِ عدالت کی کارروائی کرنی چاہیے۔