عمران خان نے مولانا فضل الرحمان کے لیے خاص پیغام دیا ہے، سلمان اکرم راجہ

Reading Time: 2 minutes

تحریک انصاف کے سیکریٹری جنرل سلمان اکرم راجہ نے کہا ہے کہ عمران خان نے جمعیت علمائے اسلام کے سربراہ مولانا فضل الرحمان کے لیے خصوصی پیغام بھیجا ہے۔

منگل کو راولپنڈی کی اڈیالہ جیل میں عمران خان سے ملاقات کے بعد میڈیا سے گفتگو میں انہوں نے کہا کہ تحریک انصاف کے بانی کی صحت کے حوالے سے بہت افواہیں پھیلائی گئیں، معمول کی کا چیک اَپ ہوا وہ بالکل ٹھیک ہیں۔

’عمران خان کو سحری نہ دینے اور عبادت سے روکنے کی باتوں میں بھی صداقت نہیں۔ وہ قوم کی خاطر جیل میں ہیں۔‘

سلمان راجہ کے مطابق ’عمران خان نے وضاحت سے کہا کہ جو لیڈر شپ پر حملہ آور ہوتا ہے وہ بھگوڑے ہیں ، وہ عوام میں اپنی جگہ بنانے کے لیے ایسا کرتے ہیں۔‘

ان کا کہنا تھا کہ ’خان صاحب کو پارٹی سے کوئی شکایت نہیں ہے، آگے کے لائحہ عمل پر بات ہوئی ہے، سیاسی رفقاء سے 5ماہ سے ملاقات نہیں ہوئی اس حوالے سے ہدایات دی گئی ہیں۔‘

پارٹی کے سیکریٹری جنرل نے کہا کہ جیل کے تمام معاملات کے حوالے سے چوہدری ظہیر عباس کو بانی اور بشری بی بی نے اپنا وکیل مقرر کیا ہے۔ بدقسمتی سے کچھ لوگوں نے وکالت کے ذریعے اپنا سیاسی قد بڑھانے کی کوشش کی۔

’جس کو خان صاحب ذمہ داری دیں اس کو سیاست کرنی چاہیے، نیاز اللہ نیازی کو بانی پی ٹی آئی کا ترجمان مقرر کیا گیا ہے۔‘

سلمان اکرم راجہ نے کہا کہ فیصل چوہدری کو ہدایت دی گئی ہے کہ وہ تمام پٹیشنز چوہدری ظہیر عباس کے سپرد کر دیں۔

’اپوزیشن اتحاد کے حوالے سے بات ہوئی پوری بات نہیں بتاؤں گا۔ مولانا کی عزت کرتے ہیں چاہتے ہیں وہ اس اتحاد میں شامل ہوں۔‘

انہوں نے بتایا کہ مولانا کے حوالے سے بانی پی ٹی آئی نے کچھ ہدایات دی ہیں جو میں ان تک پہنچاؤں گا۔

’بیرسٹر سیف نے جو غیر زمہ دارانہ بیان دیا اس حوالے شیخ وقاص اکرم کو کہا ہے کہ وہ ان سے پوچھیں کہ یہ بیان دینے کی ضرورت کیوں پیش آئی۔‘