مستونگ میں پولیس پر حملے میں تین ہلاک، 16 زخمی

Reading Time: < 1 minute

بلوچستان حکومت کے ترجمان شاہد رند نے ضلع مستونگ میں پولیس اہلکاروں پر حملے میں تین اہلکاروں کی اموات اور 16 کے زخمی ہونے کی تصدیق کی ہے۔

ترجمان کے مطابق منگل کو آر ٹی سی قلات سے پولیس اہلکاروں کو لے جانے والے ٹرک کے قریب بارودی سرنگ (آئی ای ڈی) دھماکہ کیا گیا۔

ترجمان بلوچستان حکومت شاہد رند نے بتایا کہ
“دھماکے میں بلوچستان کانسٹیبلری کے تین جوان شہید ہوئے جبکہ 16 اہلکار زخمی ہیں۔“
ترجمان کے مطابق زخمیوں میں دو اہلکاروں کی حالت تشویشناک ہے۔ “تمام زخمیوں کو اسپتال منتقل کر دیا گیا ہے، جبکہ شدید زخمیوں کو کوئٹہ منتقل کیا جا رہا ہے۔”

ترجمان بلوچستان حکومت نے بتایا کہ واقعے کی تحقیقاتی رپورٹ طلب کرلی گئی ہے۔

ترجمان کے مطابق اہلکار بلوچستان نیشنل پارٹی کے دھرنے کی سیکیورٹی پر تعینات تھے۔