انڈیا سے امدادی گندم کے ٹرک پاکستان کے راستے افغانستان روانہ

Reading Time: < 1 minute

انڈیا نے پاکستان کے راستے امدادی گندم افغانستان بھجوا دی ہے۔

ایسوسی ایٹڈ پریس کے مطابق انڈیا سے 2500 ٹن امدادی گندم کے پچاس ٹرک منگل گو واہگہ کے راستے پاکستان میں داخل ہوئے جو طورخم سرحد سے افغانستان جائیں گے۔

انڈیا میں تعینات افغان سفیر فرید ماموند زئی نے ٹویٹ میں مودی حکومت کا شکریہ ادا کیا کہ انہوں نے ایسے موقع پر فراخ دلی کا مظاہرہ کیا جب دو کروڑ سے زیادہ افغانوں کو بحران کا سامنا ہے۔

سفیر کے مطابق ساڑھے چار ماہ کے انتظار کے بعد 50 ٹرکوں میں 50 ہزار میٹرک ٹن گندم انڈین سے افغانستان پہنچ رہی ہے۔

گزشتہ ہفتے پاکستانی عہدیداروں نے کہا تھا کہ انڈیا کو براستہ واہگہ افغانستان گندم ترسیل کی اجازت دی جائے گی جہاں لاکھوں کی تعداد میں افراد کو خوراک کی شدید کمی کا سامنا ہے۔

پاکستان کی وزارت خارجہ کے ایک عہدیدار نے بتایا تھا کہ انڈیا کے ساتھ ہونے والے معاہدے کے تحت افغانستان سے آنے والے ٹرک اٹاری واہگہ کے راستے انڈیا میں داخل ہوں گے جہاں سے وہ گندم لے کر واپس طورخم سرحد سے افغانستان جائیں گے۔

انڈیا کے افغانستان کو 50 ہزار میٹرک ٹن امدادی گندم اور ادویات بھجوانے کے اعلان کے تین ماہ بعد پاکستان نے انڈین سامان کو گزرنے کی اجازت دینے کا فیصلہ کیا۔

پاکستان بھی بحران زدہ افغان عوام کی مدد کے لیے خوراک اور ادویات بھجوا چکا ہے۔