پاڑا چنار دھماکے میں 20 شہید

قبائلی علاقے کرم ایجنسی کے ہیڈ کوارٹر پاڑا چنار میں ہونے والے دھماکے میں کم از کم 20 افراد شہید اور 30 زخمی ہو گئے ہیں۔ فوج  کی جانب سے جاری بیان کے مطابق زخمیوں کو ہیلی کاپٹر کے ذریعے پشاور کے ہسپتالوں میں منتقل کیا گیا۔ یہ دھماکہ سبزی منڈی کی عیدگاہ مارکیٹ میں ہوا۔ پولیٹکل انتظامیہ کے اہلکاروں نے بتایا کہ دھماکہ صبح  اس وقت ہوا جس وقت منڈی میں بڑی تعداد میں لوگ موجود تھے۔ ہسپتال میں موجود ایک اہلکار نے بتایا کہ 55 سے زیادہ زخمی ہسپتال لائے گئے ہیں جنھیں طبی امداد فراہم کی جاری ہے۔ زخمیوں میں کچھ کی حالت تشویشناک بتائی گئی ہے۔ دھماکے کی نوعیت کا اب تک علم نہیں ہو سکا۔ تاہم کالعدم تحریکِ طالبان پاکستان نے حملے کی ذمہ داری قبول کرتے ہوئے اسے خودکش حملہ قرار دیا ہے۔ طالبان کے ترجمان محمد خراسانی کی جانب سے جاری بیان میں اس حملے کو اپنے ساتھیوں کی ہلاکت کا بدلہ قرار دیا گیا ہے۔