سیکیورٹی واپس لینے کا فیصلہ معطل

Reading Time: < 1 minute

اسلام آباد ہائی کورٹ نے سابق چیف جسٹس افتخار چوہدری سے اضافی سیکیورٹی واپس لینے کا فیصلہ معطل کر دیا ہے ۔افتخار چوہدری کی سیاسی جماعت کے عہدیدار شیخ احسن الدین نے سابق چیف جسٹس کو فراہم کی گئی اضافی سیکیورٹی واپس لینے کے فیصلے کے خلاف ہائی کورٹ میں انٹر اکورٹ اپیل دائر کی تھی ۔

 وکیل احسن الدین نے موقف اختیار کیا تھا کہ سابق چیف جسٹس افتخار چوہدری بلٹ پروف گاڑی واپس کرنے کو تیار ہیں لیکن انہیں شدید خطرات لاحق ہوسکتے ہیں ۔ عدالت نے فریقین کے وکلا سننے کے بعد فیصلہ محفوظ کیا تھا جو اب جاری کردیا گیا ہے ۔ عدالت عالیہ کے چیف جسٹس انور کاسی اور جسٹس عامر فاروق نے اپنے تحریری حکم میں افتخار چوہدری سے اضافی سیکیورٹی واپس لینے کا فیصلہ معطل کر دیا ہے ۔ مقدمے کی سماعت تفصیلی دلائل کیلئے دو ہفتے بعد ہوگی ۔

واضح رہے کہ سیکیورٹی خدشات کے پیش نظر حکومت پاکستان نے چوہدری افتخار کو بلٹ پروف گاڑی اور اضافی سیکیورٹی فراہم کی تھی، انہیں دی گئی سیکیورٹی سے متعلق کیس کی سماعت اسلام آباد ہائی کورٹ کے جسٹس محسن اختر کیانی نے کی تھی، فاضل جج نے سابق چیف جسٹس کو گاڑی اور اضافی سیکیورٹی واپس کرنے کا حکم دیا تھا ۔