مودی کی پاکستان کو پھر دھمکی

کشمیر کے ضلع پلوامہ میں سیکورٹی فورسز پر حملے میں ہلاکتوں کے بعد انڈیا کی جانب سے پاکستان کے خلاف سفارتی مہم جاری ہے تو دوسری طرف انڈیا کے وزیراعظم نریندر مودی مسلسل پاکستان کو دھمکی دے رہے ہیں ۔

نریندر مودی نے کہا ہے کہ پلوامہ کے حملے کے ساتھ بات چیت کا وقت ختم ہو گیا اور اب دہشت گردی کے خلاف ٹھوس قدم اٹھانے کی ضرورت ہے۔ انہوں نے کہا کہ کارروائی سے ہچکچانہ بھی دہشتگردی کو فروغ دینے کے برابر ہے۔

پیر کو دلی میں ارجینٹینا کے صدر کے ساتھ مزاکرات کے بعد صحافیوں سے گفتگو کرتے ہوئے نریندر مودی نے کہا کہ پلوامہ میں حملے نے یہ واضح کر دیا ہے کہ اب بات چیت کے لیے وقت نکل چکا ہے۔ اب ساری دنیا کو متحد ہو کر دہشت گردی اور اس کے حامیوں کے خلاف جامع قدم اٹھانے کی ضرورت ہے ۔

انڈیا کے وزیراعظم نے کہا کہ اب کارروائی سے گریز نہیں کیا جا سکتا۔ مودی کا کہنا تھا کہ ‘دہشت گردوں اور ان کے انسانیت دشمن حامیوں کے خلاف کارروائی سے ہچکچانا بھی دہشت گردی کو فرغ دینے کے مترادف ہے۔‘

اس سے قبل جمعہ کو وزیراعظم مودی ایک عوامی جلسے سے خطاب کرتے ہوئے کہا تھا کہ مجھے معلوم ہے کہ آپ کے دل میں کتنا غصہ ہے۔ جتنا غصہ آپ کے دل میں ہے اتنا ہی غصہ میرے دل میں بھی ہے۔