ابھینندن کی رہائی پر تاریخ مسخ کی گئی: فوجی ترجمان

Reading Time: < 1 minute

پاکستان کی فوج کے ترجمان نے میجر جنرل افتحار بابر کہا ہے کہ انڈین پائلٹ ابھینندن کی رہائی کو ذمہ دار ریاست کے ردعمل کے علاوہ کسی اور چیز سے جوڑنا انتہائی گمراہ کن ہے اور پاکستانی فتح کو متنازع بنانے کی کوشش ہے۔
ان کا کہنا تھا کہ ایسے منفی بیانات کے قومی سلامتی پر اثرات ہوتے ہیں۔ ’یہی بیانیہ انڈیا کی شکست کو کم کرنے کے لیے استعمال کیا جاتا ہے۔‘
فوجی ترجمان نے کہا کہ گزشتہ روز ایک ایسا بیان دیا گیا جس میں قومی سلامتی سے متعلق معاملات کے حوالے سے تاریخ کو مسخ کرنے کی کوشش کی گئی۔
انہوں نے کہا کہ ’ہم سب کو انتہائی ذمہ داری سے آگے بڑھنا ہوگا۔‘
فوج کے ترجمان نے کہا کہ پاکستان کی فتح کو دنیا میں تسلیم کیا گیا اور انڈیا نے اس شکست کی وجہ کو رفائل طیاروں کی عدم دستیابی قرار دیا۔
ابھی نندن کی رہائی کو پوری دنیا نے سراہا۔ انڈیا نے جارحیت کی اور انہیں منہ کی کھانی پڑی۔
’وہ باردو جو پاکستان کے شہریوں پر پھینکنے آئے تھے بدحواسی میں خالی پہاڑوں پر پھینک کر چلے گئے۔‘
ترجمان نے کہا کہ دشمن کو اعلانیہ دن کی روشنی میں جواب دیا۔ ’دشمن کے دو جہاز مار گرائے اور ان کے پائلٹ کو گرفتار کیا۔ انڈیا کے خلاف واضح فتح ملی۔‘
میجر جنرل بابر افتخار نے کہا کہ پاکستان کے خلاف ہر سازش کو ناکام بنائیں۔
فوج کے ترجمان کا کہنا تھا کہ مسلح افواج ایک منظم ادارہ ہے، اس کی قیادت اور رینک اینڈ فائل فرق نہیں ڈالا جا سکتا، یہ دونوں ایک ہیں۔