نیب کے چیئرمین سینیٹ کمیٹی میں پیش ہوں ورنہ وارنٹ

Reading Time: < 1 minute

پاکستان کی پارلیمنٹ کے ایوان بالا (سینیٹ) کے ڈپٹی چیئرمین سلیم مانڈوی والا نے کہا ہے کہ چیئرمین نیب سینیٹ کمیٹی میں پیش نہ ہوئے تو ان کے وارنٹ جاری ہوسکتے ہیں۔

اتوار کو لاہور میں نیوز کانفرنس کرتے ہوئے سلیم مانڈوی والا نے کہا کہ میں اپنے موقف پر قائم ہوں کہ چیئرمین نیب آگر سینیٹ کمیٹی کے سامنے پیش نہیں ہوتے تو ان کے وارنٹ جاری ہوں گے۔

ان کا کہنا تھا کہ اس سلسلے میں سینیٹ کے قواعد اور طریقہ کار  پر عمل درآمد کیا جائے گا اور انہیں پیش کرنے کے لیے وارنٹ جاری کریں گے، یہ سینیٹ کمیٹی کا اختیار ہے۔

مانڈوی والا نے کہا کہ نیب آرڈیننس میں ترمیم نہ کرنا سیاسی جماعتوں کی ناکامی اور غلطی ہے۔

ڈپٹی چیئرمین سینیٹ کا کہنا تھا کہ اگر سیاسی جماعتیں وقت پر ترمیم لے آتیں تو آج یہ حال نہ ہوتا۔

’سیاسی انتقام کا نشانہ اپنی جگہ مگر کاروباری شخصیات کا نیب سے کیا لینا دینا ہے، کوئی پلاٹ بیچے تو نیب کا نوٹس آجاتا ہے، کوئی چیز درآمد کریں تو نیب کا نوٹس آجاتا ہے۔‘

انہوں نے کہا کہ نیب والے ہاؤسنگ سوسائٹیز والوں کو نوٹس جاری کرکے کہتے ہیں کہ آپ کی گورننگ باڈی ہم بنائیں گے۔

مانڈوی والا کے مطابق نیب افسران کی ڈگریاں اور ڈومیسائل جعلی ہیں، دو دو تین تین ڈومیسائل ہیں۔ان کے اثاثے آمدنی سے زائد ہیں۔

ڈپٹی چیئرمین سینیٹ کا کہنا تھا کہ پھر نیب کا ہر چیز کا انچارج بنا دیں اور باقی سارے ادارے بند کر دیں۔ نیب کی وجہ سے لوگ ملک چھوڑ کر چلے گئے۔