عمر سعید شیخ اور دیگر ملزمان کی نظربندی غیر قانونی، رہا کرنے کا حکم

Reading Time: < 1 minute

سندھ ہائیکورٹ نے امریکی صحافی ڈینیئل پرل قتل کیس میں بری و سزا پوری کرنے والے احمد عمر سعید شیخ اور دیگر چار ملزمان کی نظربندی غیرقانونی قرار دیتے ہوئے رہا کرنے کا حکم دیا ہے۔
جمعرات کو احمد عمر شیخ و دیگر ملزمان کی بریت کے بعد نظر بندی کے خلاف درخواست کی سماعت سندھ ہائیکورٹ میں ہوئی۔
عدالت نے احمد عمر شیخ سمیت 4 ملزمان کی نظر بندی کے نوٹیفکیشن کالعدم قرار دے کر ملزمان کو فوری طور پر جیل سے رہا کرنے کا حکم دیا۔ تاہم احمد عمر شیخ سمیت تمام ملزمان کا نام ای سی ایل میں شامل کرنے کا حکم بھی دیا۔
عدالتی حکم کے مطابق ملزمان بغیر کسی جرم کے 18 سال سے جیل میں ہیں اور اب ان کی نظر بندی غیر قانونی قرار دی جاتی ہے۔
اسسٹنٹ اٹارنی جنرل نے بتایا کہ ملزمان کی نظر بندی کا اختیار صوبائی حکومت کا ہے، محکمہ داخلہ نے 28 ستمبر کو ملزمان کو اے ٹی اے کی سیکشن 11EEE کے تحت نظر بند کیا تھا۔
عدالت نے کہا کہ ملزمان کو جب عدالت طلب کرے گی تو پیش ہوں۔
انسداد دہشت گردی کی عدالت نے احمد عمر شیخ کو سزائے موت سنائی تھی۔ دیگر تین ملزمان کو عمر قید کی سزا سنائی تھی ۔ دیگر ملزمان میں فہد نسیم،سید سلمان ثاقب اور شیخ محمد عادل شامل تھے۔
سندھ ہائی کورٹ نے تمام سزا کے خلاف اپیل منظور کرتے ہوئے بری کر دیا تھا۔