ٹینس کی عظیم کھلاڑی سرینا ولیمز کو ہرانے والی آسٹریلوی سٹار نے کیا کہا؟

Reading Time: < 1 minute

ٹینس کے کھیل کی عظیم کھلاڑی سرینا ولیمز کو سخت مقابلے کے بعد یو ایس اوپن کے میچ میں ہرانے والی آسٹریلوی کھلاڑی عجلا ٹامیانووک نے کہا ہے کہ اُن کو افسوس ہے اور وہ بھی دیگر تمام لوگوں کی طرح سرینا ولیمز سے محبت کرتی ہیں۔

نیویارک میں یو ایس اوپن کے تیسرے راؤنڈ میں سرینا ولیمز شکست دینے کے بعد آسٹریلوی ٹینس سٹار نے کہا کہ ’سرینا ولیمز اس کھیل کی ہمیشہ کے لیے عظیم ترین کھلاڑی ہیں اور اسی پر بات ختم ہے۔‘

ٹامیانووک کا کہنا تھا کہ ’سرینا نے میرے لیے جو کچھ کیا اور ٹینس کے کھیل کے لیے جو کیا وہ ناقابل بیان ہے۔‘

انہوں نے کہا کہ ’میں نے کبھی نہیں سوچا تھا کہ سرینا ولیمز کے خلاف اُن کے آخری میچ میں کھیلوں گی۔ میں نے اُن کو اس ٹورنامنٹ کے فائنلز میں کتنی بار کھیلتے ہوئے دیکھا، اس لیے یہ لمحہ میرے لیے خوشی کا ہے۔‘

اس سے قبل 23 گرینڈ سلام ٹینس ٹورنامنٹ جیتنے والی اور نیویارک میں چھ بار یو ایس اوپن کی فاتح رہنے والی سرینا ولیمز نے اپنی شکست پر کہا کہ وہ ٹینس سے ریٹائرمنٹ کے اپنے فیصلے پر نظرثانی نہیں کریں گی۔ تاہم ساتھ ہی کہا کہ ’آپ کو مستقبل کا کچھ پتا نہیں ہوتا۔‘

سرینا ولیمز کا آسٹریلوی کھلاڑی کے ساتھ میچ تین گھنٹے سے زائد وقت تک جاری رہا تھا۔

آسٹریلوی کھلاڑی ٹامیانووک نے کہا کہ وہ آخر تک سمجھ رہی تھیں کہ سرینا میچ جیت جائیں گی۔