محسن نقوی پنجاب کے نگراں وزیراعلیٰ مقرر، پی ٹی آئی کا احتجاج

Reading Time: < 1 minute

پاکستان کے الیکشن کمیشن نے محسن رضا نقوی کو پنجاب کا نگراں وزیراعلیٰ مقرر کر دیا ہے۔

اتوار کی رات کو نگراں وزیراعلی کی تقرری کے لیے الیکشن کمیشن کا اجلاس ہوا جس کی صدارت چیف الیکشن کمشنر نے کی۔

اجلاس کے بعد الیکشن کمیشن کی جانب سے جاری ہونے والے بیان کے مطابق ’آئین اسلامی جمہوریہ پاکستان کے آرٹیکل 224 (اے) (3) کے تحت نگران وزیراعلٰی پنجاب کی تعیناتی کے سلسلے میں آج الیکشن کمیشن کا اہم اجلاس ہوا جس کی صدارت چیف الیکشن کمشنر سکندر سلطان راجہ نے کی۔

’اجلاس میں ممبران الیکشن کمیشن نثار احمد درانی، شاہ محمد جتوئی، بابر حسن بھروانہ اور جسٹس ریٹائرڈ اکرام اللہ خان نے شرکت کی۔‘

بیان کے مطابق ’الیکشن کمیشن نے مکمل غور و خوض کے بعد سید محسن رضا نقوی کو نگران وزیراعلٰی پنجاب تعینات کر دیا ہے، اور اس بابت باضابطہ نوٹیفکیشن جاری کر دیا گیا ہے۔ اسی سلسلے میں گورنر پنجاب کو خط لکھا گیا ہے کہ وہ نگران وزیراعلٰی پنجاب سے حلف لیں۔‘

دوسری جانب پاکستان تحریک انصاف اور سبکدوش ہونے والے وزیراعلٰی پنجاب چوہدری پروزی الٰہی نے نے محسن نقوی کا تقرر مسترد کر دیا۔

پی ٹی آئی کے مرکزی رہنما فواد چوہدری نے ٹوئٹ کی کہ ’الیکشن کمیشن نے کبھی مایوس نہیں کیا، محسن نقوی جیسے متنازع شخص کو وزیر اعلی مقرر کرنے کے فیصلے کو مسترد کرتے ہیں، اس نظام کے خلاف سڑکوں پر جدوجہد کے علاوہ کوئی راستہ نہیں۔ کارکنان تیاری کریں عمران خان کی قیادت میں بڑی مہم چلائیں گے۔‘