عالمی خبریں

ایک دن میں 500 روسی فوجی ہلاک و زخمی کیے: یوکرینی فوج

مارچ 12, 2023 < 1 min

ایک دن میں 500 روسی فوجی ہلاک و زخمی کیے: یوکرینی فوج

Reading Time: < 1 minutes

یوکرین کی فوج نے دعویٰ کیا ہے کہ اُس نے گزشتہ 24 گھنٹوں کے دوران مشرقی شہر باخموت میں لڑائی کے دوران 500 سے زائد روسی فوجیوں کو ہلاک اور زخمی کیا ہے۔

خبر رساں ایجنسی روئٹرز نے یوکرینی فوج کے ترجمان کے حوالے سے بتایا ہے کہ روسی فوج کو بھاری جانی نقصان پہنچایا گیا۔

یوکرین کے مشرقی ڈونباس خطے میں واقع باخموت شہر کا کنٹرول حاصل کرنے کے لیے روسی افواج کئی ماہ سے حملے کر رہی ہیں۔

روئٹرز کے مطابق دونوں اطراف نے اس دوران ایک دوسرے کو بھاری جانی نقصان پہنچانے کے دعوے کیے ہیں تاہم درست تعداد کی تصدیق بہت مشکل ہے۔

یوکرین کے مشرقی محاذ پر برسر پیکار افواج کے ترجمان سرہی چیریواتی نے بتایا کہ گزشتہ 24 گھنٹوں کے دوران روسی افواج نے 16 حملے کیے جبکہ باخموت شہر کے قریب 23 مختلف مقامات پر لڑائی ہو رہی ہے۔
انہوں نے نیشنل پارلیمنٹ ٹی وی چینل کو بتایا کہ ’لڑائی کے دوران دشمن کے 221 فوجی مارے گئے جبکہ 314 کو مختلف نوعیت کے زخم آئے۔‘

ترجمان کے بیان سے یہ واضح نہیں ہے کہ ان کا اشارہ جمعے سے ہونے والی ہلاکتوں کے بارے میں ہے یا تازہ ترین 24 گھنٹوں کے دوران اموات کی بات کر رہے ہیں۔

روئٹرز کے مطابق فوری طور پر اس دعوے کی تصدیق نہیں کی جا سکی۔

یوکرین کے صدر ولادیمیر زیلنسکی کے ایک مشیر نے جمعے کو کہا تھا کہ اُن کی افواج نے باخموت میں جنگ جاری رکھنے کا فیصلہ کیا ہے کیونکہ وہاں روسی افواج کی بہترین یونٹس کو بھاری نقصان پہنچ رہا ہے۔

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے