اسلام آباد میں میری گرفتاری کا منصوبہ تیار ہے: عمران خان

Reading Time: < 1 minutes

پاکستان تحریک انصاف کے چیئرمین عمران خان نے کہا ہے کہ اسلام آباد میں وہ عدالت پیشی پر جا رہے ہیں اور حکومت نے اُن کی گرفتاری کا منصوبہ تیار کیا ہے۔

سنیچر کو موٹروے پر گاڑی میں ریکارڈڈایک ویڈیو پیغام میں عمران خان کا کہنا ہے کہ ان کو معلوم ہے کہ گرفتار کر لیے جائیں گے۔

’میرے گھر پر حملے کا مقصد یہ تھا کہ مجھے جیل میں ڈال لیں۔ جیل میں ڈالنا لندن پلان کا حصہ ہے۔ نواز شریف کا مطالبہ ہے کہ مجھے جیل میں ڈال دیں اور الیکشن میں حصہ نہ لے سکیں۔‘

ان کا کہنا تھا کہ ’وہ قانون کی حکمرانی پر یقین رکھتے ہیں اور پتا ہوئے بھی عدالت میں پیش ہو رہے ہیں۔‘

اس سے قبل عمران خان نے ٹویٹ کیا ہے کہ پنجاب پولیس نے زمان پارک میں ان کے گھر پر حملہ کیا ہے جہاں ان کی ان اہلیہ بشریٰ بیگم اکیلی موجود ہیں۔

عمران خان نے سوال اٹھایا کہ کس قانون کے تحت یہ سب کیا جا رہا ہے؟

’یہ سب لندن پلان کا حصہ ہے جہاں ایک تعیناتی کے بدلے میں مفرور نواز شریف کو اقتدار میں واپس لانے کے وعدے کیے گئے۔‘