اسرائیل میں ملازمت کرنے والے پانچ پاکستانی وطن واپسی پر گرفتار

Reading Time: < 1 minute

وفاقی تحقیقاتی ادارے (ایف آئی اے) نے اسرائیل میں ملازمت کرنے والے پانچ پاکستانیوں کو وطن واپسی پر گرفتار کیا ہے۔

پاکستان کی حکومت اسرائیل کو تسلیم نہیں کرتی اور ملکی پاسپورٹ پر واضح لکھا ہے کہ یہ اسرائیل کے لیے کارآمد نہیں۔

صوبہ سندھ میں ایف آئی اے کرائم سرکل میرپور خاص نے کارروائی کرتے ہوئے اسرائیل میں ملازمت اختیار کرنے والے 5 پاکستانی ملزمان کو گرفتار کیا ہے جب کہ مجموعی طور پر 8 ملزمان کے خلاف 5 مقدمات درج کر لیے گئے۔

ملزمان تل ابیب میں بطور ہیلپر اور کار واشر ملازمت کرتے رہے ہیں۔

ترجمان ایف آئی اے کے مطابق ملزمان گزشتہ پانچ سال کے دوران تل ابیب میں مقیم رہے، جنہوں نے اسرائیلی ایجنٹ کے ذریعے انٹری حاصل کی۔

ملزمان نے اسرائیلی ایجنٹ کو فی کس 3 سے 4 لاکھ روپے ادا کیے۔

گرفتار ملزمان نعمان صدیقی، کامل انور، کامران صدیقی، محمد ذیشان اور محمد انور کا تعلق میرپور خاص سے ہے، جو شینگن ویزے پر اُردن ایئرپورٹ سے اسرائیل داخل ہوتے تھے۔

ملزمان ویسٹرن یونین کے ذریعے پاکستان رقوم منتقل کرتے رہے اور ترکیہ، کینیا و سری لنکا سے بھی اردن ایئرپورٹ اُتر کر اسرائیل میں داخل ہوتے رہے۔

ملزمان وطن واپسی کے لیے دبئی کے راستے اردن ایئرپورٹ سے کراچی آتے تھے۔

ملزمان کے خلاف پاسپورٹ ایکٹ اور امیگریشن آرڈیننس کے تحت مقدمات درج کر لیے گئے۔ دیگر ملزمان کی گرفتاری کے لیے چھاپے مارے جا رہے ہیں۔