شیخ رشید کس انٹیلیجنس دفتر میں؟ ہائیکورٹ کی پولیس حکام کو آخری وارننگ

لاہور ہائی کورٹ نے راولپنڈی پولیس کو سابق وزیر داخلہ شیخ رشید احمد کو ایک ہفتے میں بازیاب کر کے عدالت میں پیش کرنے کا حکم دیا ہے۔ حکم عدولی پر پولیس حکام کے خلاف مقدمہ درج کیا جائے گا۔

پیر کو سابق وزیر داخلہ شیخ رشید کی گرفتاری کے خلاف درخواست کی ہائی کورٹ میں سماعت کی گئی۔

پولیس حکام نے بیان دیا کہ شیخ رشید کا بھتیجا اور ملازم واپس آ چکے ہیں۔

جسٹس صداقت علی خان نے ریجنل پولیس آفیسر کی رپورٹ مسترد کرتے ہوئے کہا کہ آر پی او صاحب، آپ نے حد کراس کر دی۔

اُن کا کہنا تھا کہ آئندہ ہفتے تک شہخ رشید نہ ملے تو گرفتار کرنے والے ایس ایس پی آپریشن، ڈی ایس پی اور 4 ایس ایچ اوز کے خلاف مقدمہ درج ہوگا۔

درخواست گزار کے وکیل نے ہائی کورٹ کو بتایا کہ شیخ رشید کو گھر سے گرفتار کر کے گولڑہ شریف انٹیلیجنس دفتر منتقل کیا گیا۔

وکیل نے کہا کہ شیخ رشید کو گولڑہ انٹیلیجنس دفاتر منتقل کرنے کی وڈیوز موجود ہیں۔

جسٹس صداقت علی نے کہا کہ آر پی او صاحب ایک ہفتے کی آخری وارننگ ہے شیخ رشید نہ ملے تو تمام افسران کے خلاف مقدمہ درج کراؤں گا۔

جسٹس صداقت علی خان نے درخواست گزار اور وکلا کو شیخ رشید احمد کی گرفتاری کے حوالے سے بیان حلفی بھی عدالت میں جمع کرانے کی ہدایت کی۔