یوٹیوبرز سے اظہارِ لاتعلقی، ڈر ہے ملک میں بغاوت نہ ہو جائے: پی ٹی آئی

Reading Time: < 1 minute

تحریک انصاف کے رہنما اسد قیصر نے کہا ہے کہ اُن کی جماعت کو ڈر ہے کہ ملک میں بغاوت نہ ہو جائے۔

منگل کو اسلام آباد میں میڈیا سے گفتگو میں اُن کا کہنا تھا کہ عمران خان اس وقت ملک کے سب ے بڑے سیاسی لیڈر ہیں۔

اُن کے مطابق پی ٹی آئی کے مینڈیٹ پہ ڈاکہ ڈالا گیا، فارم 45 الیکشن کمیشن کی دستاویزات ہیں۔

اسد قیصر نے کہا کہ فارم 45 پر کوئی اور نتیجہ ہے جبکہ فارم 47 پر کچھ اور نتیجہ ہے، کسی طور پر اپنے حق سے پیچھے نہیں ہٹیں گے۔

انہوں نے دعویٰ کیا کہ اب ہماری جنگ صرف اپنی سیاست کے لیے نہیں ہے، اب یہ جنگ ہماری قوم کے لیے ہے۔

پی ٹی آئی کے رہنما سے کہا کہ ہمارا سب سے پہلا مطالبہ یہ ہے کہ آئین کے مطابق سب ادارے اپنی حدود ہیں رہیں، ہماری جدوجہد عدلیہ کو آزاد کروانے کی ہوگی۔
عدلیہ دباؤ میں آنے کی بجائے آزادنہ فیصلے کرے، ہماری 180 سیٹیں چھینی گئیں۔ ہماری مخصوص نشستیں چھینیں گئیں۔

اُن کے مطابق نواز شریف نے نعرہ لگایا کہ ووٹ کو عزت دو، جعلی وزیراعظم بن گیا ہے، ہم شہباز شریف کو وزیراعظم نہیں مانتے۔

اسد قیصر نے کہا کہ کراچی، اسلام آباد، پنڈی سمیت دیگر جگہوں کے ایم این ایز جانتے ہیں کہ وہ جیتے ہوئے نہیں ہیں، ڈر ہے اس ملک میں بغاوت نہ ہو جائے۔

اُن کا کہنا تھا کہ ہم اپنی تحریک جاری رکھیں گے، ہم تمام سیاسی قوتوں کو اکھٹا کریں گے، بڑے پیمانے پر قانون اور آئین کے مطابق تحریک چلائیں گے، اگر حق نہیں ملتا تو سڑکوں پہ نکلیں گے۔ فوج کے خلاف بولنے والے یوٹیوبرز سے اظہار لاتعلقی کا اعلان کرتے ہیں۔