سوشل میڈیا صارفین کا دباؤ، فوج کا بہاولنگر واقعے کی مشترکہ انکوائری کا اعلان

Reading Time: < 1 minute

پاکستان کی فوج نے پنجاب کے ضلع بہاولنگر میں پولیس تھانے پر حملے کرنے اور اہلکاروں کو زدوکوب کرنے کے واقعے کی مشترکہ تحقیقات کا اعلان کیا ہے۔

جمعے کو فوج کے ترجمان نے ایک بیان میں کہا ہے کہ حال ہی میں بہاولنگر میں ایک افسوسناک واقعہ پیش آیا، جسے فوج اور پولیس حکام کی مشترکہ کوششوں سے فوری طور پر حل کیا گیا۔

بیان کے مطابق اس کے باوجود مخصوص مقاصد کے حامل بعض دھڑوں نے ریاستی اداروں اور سرکاری محکموں کے درمیان تقسیم پیدا کرنے کے لیے سوشل میڈیا پر پروپیگنڈا شروع کر دیا۔

فوج نے کہا ہے کہ منصفانہ انکوائری کو یقینی بنانے اور قوانین کی خلاف ورزی اور اختیارات کے ناجائز استعمال کی ذمہ داری کا تعین کرنے کے لیے، حقائق کا پتہ لگانے اور ذمہ داروں کے تعین کے لیے سیکورٹی اور پولیس اہلکاروں پر مشتمل مشترکہ تفتیش کی جائے گی۔