رات گئے اڈیالہ جیل کے گیٹ سے کار ٹکرانے والا گرفتار

راولپنڈی پولیس نے سکیورٹی کے حوالے سے حساس ترین قرار دی گئی اڈیالہ جیل کے گیٹ سے کار ٹکرا کر زبردستی داخل ہونے کی کوشش کرنے والے کار ڈرائیور کو حراست میں لے کر مقدمہ درج کیا ہے۔

مقدمہ تھانہ صدر بیرونی میں چوکی اڈیالہ کے انچارج افتاب احمد کی مدعیت میں درج کیا گیا۔

ایف آئی آر کے مطابق ملزم نےسیکورٹی اہلکاروں کو جان سے مارنے کی نیت سے گاڑی سے کچلنے کی کوشش کی۔

مقدمے کے مطابق گاڑی کی ٹکر لگنے سے کانسٹیبل فہد گر گیا اور بمشکل اپنی جان بچائی۔

ایف آئی آر میں لکھا گیا ہے کہ گاڑی کی ٹکر لگنے سے جیل کے گیٹ کا قبضہ ٹوٹ گیا، کنڈا کھلنے پر ملزم نے جیل کے اندر داخل ہونے کی کوشش کی۔

پولیس اہلکاروں اور ایلیٹ فورس کے ساتھ جیل سیکورٹی نے گھیرا ڈال کر ملزم کو گرفتار کیا جس کا نام مبشر حسین اور تعلق سمندری سے ہے۔