بنوں کینٹ میں دو خودکش بمباروں کے دھماکوں میں 9 شہری اموات، 25 زخمی
Reading Time: 2 minutesخیبر پختونخوا کے ضلع بنوں میں واقع کینٹ میں دو خودکش دھماکوں میں کم ازکم 9 شہری مارے گئے جبکہ 25 سے زائد زخمی ہوئے ہیں۔
خبر رساں ادارے اے پی کے مطابق دہشت گردوں نے کینٹ کی دیوار توڑنے کے لیے دو خود کش دھماکے کیے۔ دھماکوں کے بعد حملہ آور اندر گھسنے کی کوشش کی جنہیں سکیورٹی فورسز نے ہلاک کر دیا۔
تحریک طالبان پاکستان سے منسلک شدت پسند تنظیم نے حملے کی ذمہ داری قبول کر لی ہے۔
فوج کی جانب سے حملے میں ہونے والی ہلاکتوں کے بارے میں کچھ نہیں بتایا گیا ہے کہ تاہم ضلعی ہسپتال بنوں کے مطابق کم از کم نو افراد ہلاک اور 25 زخمی ہوئے ہیں۔
پاکستانی فوج کا ایک بیان میں کہنا تھا کہ دو خود کش حملہ آوروں نے بنوں کینٹ کی دیوار کے قریب اپنے آپ کواڑا دیا۔
بیان میں کہا گیا ہے کہ خود کش دھماکوں کے بعد پانچ سے چھ حملہ آوروں نے کینٹ کے اندر داخل ہونے کی کوشش کی جنہیں ہلاک کر دیا گیا۔
ترجمان کے مطابق علاقے میں آپریشن ابھی تک جاری ہے۔
پولیس آفیسر ظفر خان کے مطابق دو دھماکوں کے بعد جائے وقوعہ سے دھویں کے گہرے بادل اٹھنے لگے اور فائرنگ جاری رہی۔
ضلعی ہسپتال کے ترجمان کے مطابق ہلاک ہونے والوں میں چار بچے بھی شامل ہیں۔
دھماکوں کے باعث قریب واقع مسجد جزوی طور پر منہدم ہوئی، جس کے ملبے تلے نمازی دب گئے۔ زخمیاوں کو ڈسٹرکٹ ہیڈ کوارٹر ہسپتال منتقل کر دیا گیا، جہاں ایمرجنسی نافذ کر دی گئی ہے۔
دھماکوں سے قریبی عمارتوں کی چھتیں گرنے کے باعث متعدد افراد زخمی ہوئے ہیں۔
ترجمان کے مطابق 13 افراد کو شدید زخمی حالت میں ہسپتال منتلق کیا گیا۔ ہلاک ہونے والوں میں میں دو بچے بھی شامل ہیں۔
ہسپتال انتظامیہ کے مطابق جائے وقوعہ سے مزید زخمی بھی لائے جارہے ہیں۔ ضلعی پولیس ترجمان کے مطابق کئی زخمیوں کو بنوں ایم ٹی آئی ہسپتال بھی منتقل کردیا گیا ہے۔
پولیس نے ابھی تک دھماکے کی نوعیت اور حملہ آوروں کی ہلاکت کے حوالے سے کوئی تفصیل نہیں بتائی ہے۔
پولیس کے مطابق دھماکہ اس وقت ہوا جب لوگ روزہ افطار کر رہے تھے۔ جیش الفرسان نامی شدت پسند تنظیم نے حملے کی ذمہ داری قبول کی ہے۔
رمضان کا مہینہ شروع ہونے کے بعد یہ شدت پسندوں کا تیسرا حملہ ہے۔ ایک بیان میں تنظیم کا کہنا تھا کہ حملہ بارود سے بھری گاڑی کے ذریعے کیا گیا۔
اس سے قبل بھی کئی مرتبہ شدت پسندوں نے بنوں میں حملے کیے تھے۔
گذشتہ سال نومبر میں سکیورٹی فورسز کی چیک پوسٹ پر خود کش حملے میں 12 فوجی اہلکار مارے گئے تھے۔
