پاکستانی وزیر خارجہ کابل میں، افغانستان کا ’گہرے تحفظات‘ کا اظہار
Reading Time: < 1 minuteافغانستان نے پاکستان سے افغان شہریوں کی جبری بے دخلی پر ’گہرے تحفظات‘ کا اظہار کرتے ہوئے اسلام آباد پر زور دیا کہ وہ ’مہاجرین کے حقوق کے تحفظ کو یقینی بنائے۔‘
خبر رساں ایجنسی اے ایف پی کے مطابق سنیچر کو افغان وزیر خارجہ نے پاکستانی وزیر خارجہ کے دورہ کابل پر پہنچنے پر اُن کو اپنے تحفظات سے آگاہ کیا۔
افغان وزارت خارجہ سے جاری بیان میں کہا گیا ہے کہ وزیر خارجہ امیر خان متقی نے ’پاکستان سے افغان مہاجرین کی جبری بے دخلی سے پیدا ہونے والی صورتحال پر مایوسی کا اظہار کیا اور گہرے تحفظات ظاہر کیے۔‘
دوسری جانب پاکستانی دفتر خارجہ نے کہا ہے کہ دونوں وزرائے خارجہ کی ملاقات میں دونوں ممالک کے درمیان برادرانہ تعلقات کو مزید مظبوط کرنے کے لیے اعلٰی سطح پر تبادلوں کی اہمیت کے حوالے سے عزم کا اعادہ کیا گیا۔
پاکستان کے نائب وزیراعظم و وزیرخارجہ اسحاق ڈار نے افغانستان کے عبوری وزیر اعظم ملا محمد حسن اخوند سے بھی ملاقات کی۔
دونوں رہنماؤں نے سلامتی، تجارت، ٹرانزٹ میں تعاون اور عوامی تعلقات سمیت باہمی دلچسپی کے امور پر تفصیلی تبادلہ خیال کیا۔
پاکستان اور افغانستان کے وزرائے خارجہ کے درمیان اعلیٰ سطح کے مذاکرات آج کابل میں ہوئے ہیں۔
وزیر خارجہ کی قیادت میں شرکت کرنے والے وفد میں وزیراعظم کے نمائندہ خصوصی برائے افغانستان محمد صادق، وزیراعظم کے معاون خصوصی طارق باجوہ، وفاقی سکیریٹری برائے کامرس، ریلوے اور داخلہ کے علاوہ دیگر اعلٰی حکام شامل ہیں.
