عالمی منڈی میں تیل کی قیمتوں میں اضافے کا رجحان برقرار، خام تیل کا بیرل کتنا مہنگا؟
ایران اور امریکہ کے درمیان بڑھتی ہوئی کشیدگی کے باعث عالمی منڈیوں میں تیل کی قیمتوں میں اضافے کا رجحان برقرار ہے اور منگل کے روز برینٹ خام تیل کی قیمت 85 ڈالر سے تجاوز کر گئی۔
منگل کو تیل کی قیمتیں تقریباً تین فیصد اضافے کے بعد چار ہفتوں کی بلند ترین سطح پر پہنچ گئی ہیں۔
یہ اضافہ صدر ٹرمپ کے اس اعلان کے بعد سامنے آیاجس میں انھوں نے کہا کہ امریکہ ایران کے خلاف بحری ناکہ بندی دوبارہ نافذ کرے گا۔
اسی دوران آبنائے ہرمز میں دونوں ممالک کے درمیان بڑھتے ہوئے حملوں نے توانائی کی فراہمی کے حوالے سے خدشات اور غیر یقینی صورتحال میں اضافہ کر دیا ہے۔
حالیہ مہینوں میں عالمی منڈیوں میں توانائی کی قیمتوں میں بہت زیادہ اتار چڑھاؤ دیکھا گیا ہے کیونکہ تاجر تنازع سے متعلق پیش رفت پر ردِعمل ظاہر کرتے رہے ہیں۔
رواں سال 28 فروری کو امریکہ اور اسرائیل کے ایران پر حملوں کے فوراً بعد تہران نے عملاً آبنائے ہرمز کو بند کر دیا تھا، جس سے عام طور پر دنیا کے تقریباً 20 فیصد تیل اور مائع قدرتی گیس کی ترسیل گزرتی ہے۔
