فاروق ستار کی کنوینر شپ بحال
اسلام آباد ہائی کورٹ نے فاروق ستار کو متحدہ قومی موومنٹ (ایم کیو ایم پاکستان) کی کنوینر شپ سے ہٹانے کا الیکشن کمیشن کا فیصلہ معطل کر دیا ہے ۔
اسلام آباد ہائی کورٹ کے جسٹس عامرفاروق نے ایم کیوایم کی کنوینرشپ سے فاروق ستار کو ہٹانے کے الیکشن کمیشن کے فیصلے کے خلاف درخواست کی سماعت کی ۔ فاروق ستار کے وکیل بابرستار نے عدالت کے سامنے موقف اختیار کیا کہ الیکشن کمیشن کو ایم کیو ایم کی کنوینر شپ اور انٹرا پارٹی الیکشن سے متعلق فیصلے کا اختیار ہی نہیں تھا۔ اس لئے فیصلہ غیر قانونی قرار دیا جائے ۔
وکیل نے استدعا کی کہ کیس کی سماعت مکمل ہونے تک الیکشن کمیشن کا فیصلہ معطل کیا جائے ۔ ہائی کورٹ نے درخواست گزار کی اپیل پر الیکشن کمیشن کا فیصلہ معطل کرتے ہوئے فریقین سے جواب طلب کر لیا ۔ کیس کی مزید سماعت 11 اپریل تک ملتوی کر دی گئی ۔
