لوٹ کے وہ گھر کو آئے

ٹی وی اینکر اور صحافی حامد میر نے دوبارہ جیو نیوز سے رجوع کر لیا ہے ۔ وہ دو ماہ قبل صف اول کے میڈیا گروپ کو چھوڑ کر گورمے بیکری والوں کے نئے چینل جی این این میں چلے گئے تھے ۔

گورمے بیکری والوں نے جی ٹی روڈ پر حامد میر کی تصاویر والے بل بورڈز نصب کئے تھے جن پر اپنے بسکٹس اور مٹھائیوں کے نرخ بھی درج کئے تھے ۔ ٹوئٹر پر ان تصاویر کو شیئر کر کے کافی طنز و مزاح بھی کیا گیا تھا ۔

حامد میر کو جیو نیوز سے وابستہ دیگر افراد نے واپسی پر خوش آمدید بھی کہا ہے ۔ حامد میر کی جیو نیوز دوبارہ جوائن کرنے کی ایک تصویر بھی سامنے آئی ہے جس میں وہ گروپ کے منیجنگ ڈائریکٹر اظہر عباس کے ساتھ کھڑے ہیں ۔

ٹی وی دیکھنے والے بہت سے ناظرین نے سوشل میڈیا پر کہا ہے کہ انہوں نے گورمے بیکری کے چینل پر حامد میر کا کوئی پروگرام نہیں دیکھا ۔ حامد میر کو جیو نیوز کی وجہ سے پاکستان کا صف اول کا ٹی وی پروگرام اینکر سمجھا جاتا ہے ۔