چیف جسٹس ثاقب نثار نے کہا ہے کہ ان لوگوں کو معاف نہیں کرسکتے جنہوں نے قوم کا پیسہ کھایا اور اب بدمعاشی کر رہے ہیں، لگتا ہے کہ اومنی گروپ کے مالکان کا غرور ختم نہیں ہوا ۔

لاہور رجسٹری میں جعلی بینک اکاؤنٹس پر لئے گئے ازخود نوٹس کی سماعت کے دوران چیف جسٹس  ثاقب نثار نے آصف زرداری کے وکیل فاروق ایچ نائیک سے کہا کہ آپ وکیل ہیں، آپ نے فیس لی ہوئی ہے اس لیے ہم آپ کو سنیں گے لیکن فیصلہ ہم نے ہی کرنا ہے ۔ اس سے قبل فاروق نائیک نے کہا تھا کہ کیس بنکنگ عدالت میں زیر سماعت ہے ۔

چیف جسٹس نے اومنی گروپ کے مالکان کے وکلا منیر بهٹی اور شاہد حامد سے کہا کہ لگتا ہے کہ اومنی گروپ کے مالکان کا غرور ختم نہیں ہوا، قوم کے اربوں روپے کهاگئے اور پهر بهی بدمعاشی کر رہے ہیں، ان لوگوں کو معاف نہیں کرسکتے جنہوں نے قوم کا پیسہ کھایا، لگتا ہے انہیں اڈیالہ جیل سے کہیں اور شفٹ کرنا پڑے گا ۔

چیف جسٹس نے زرداری کے خلاف بنائی گئی جے آئی ٹی رپورٹ کے اہم حصے دکھانے کیلئے کمرہ عدالت میں پروجیکٹر لگانے کا حکم دیا ۔ انہوں نے کہا کہ جے آئی ٹی رپورٹ کی سمری اوپن کورٹ میں پروجیکٹر پرچلائی جائے گی، انور مجید پر کوئی رحم نہیں، اربوں روپے کے کهانچے ہیں، معاف نہیں کریں گے ۔

سماعت کچھ دیر بعد دوبارہ ہوگی