پاکستان کی ایئر فورس کا طیارہ گر کر تباہ

پاکستان کی فضائی فوج ایئر فورس کا ایک طیارہ ضلع اٹک میں پنڈی گھیب کے قریب گر کر تباہ ہو گیا ہے۔

ایئر فورس کی جانب سے جاری کیے گئے بیان میں بتایا گیا ہے کہ پائلٹ جہاز سے بحفاظت اترنے میں کامیاب ہو گیا جبکہ حادثے کی تحقیقات کے لیے بورڈ آف انکوائری تشکیل دے دیا گیا۔

پاک فضائیہ کے ترجمان کے مطابق ایئر فورس کا ایک طیار ہ معمول کی تربیتی پرواز کے دوران ضلع اٹک میں پنڈی گھیب کے قریب گر کر تباہ ہو گیا۔ پائلٹ جہاز سے بحفاظت اترنے میں کامیاب رہے جبکہ زمین پر کسی قسم کے جانی و مالی نقصان کی کوئی اطلاع نہیں ملی۔

ترجمان کے مطابق واقعہ کی وجوہات جاننے کے لیے ایئر ہیڈ کوارٹرز نے ایک اعلیٰ سطح کا انکوائری بورڈ تشکیل دے دیا ہے۔

ایئر فورس کی جانب سے طیارے کا نام اور ساخت ظاہر نہیں کی گئی۔