فرانس نے پاکستانی وزیر کے بیان کو جھوٹ قرار دے دیا
پاکستان میں فرانس کے سفارت خانے کے ایک ٹویٹ میں پاکستانی وزیر انسانی حقوق شریں مزاری کو ‘جھوٹی’ قرار دیا ہے۔
اتوار کو سفارت خانے کے ٹوئٹر اکاؤنٹ سے شیریں مزاری کی ٹویٹ کو ریٹویٹ کر کے لکھا گیا کہ ‘جھوٹی خبر اور غلط الزامات۔’
شیریں مزاری نے ایک ویب سائٹ کی خبر ری ٹویٹ کی تھی جس کے مطابق فرانس میں مسلمانوں کے بچوں کے لیے ‘آئی ڈی نمبر’ یا شناختی نمبر جاری کرنے فیصلہ کیا گیا ہے تاکہ ان کو سیکولر بنایا جا سکے۔
پاکستان کی وزیر نے خبر ریٹویٹ کرتے ہوئے لکھا تھا کہ فرانسیسی صدر میکخواں مسلمانوں کے ساتھ وہ کر رہے ہیں جو جرمنی میں نازیوں نے یہودیوں کے ساتھ کیا تھا کہ ان کے بچوں کی شناخت کے لیے کپڑوں پر زرد ستارہ لگایا۔
Fake news and false accusation. https://t.co/BKrnFCQp1Z
— France in Pakistan (@FranceinPak) November 22, 2020
واضح رہے کہ فرانس کے وزیر داخلہ گیرالڈ درمانن نے دو روز قبل کہا تھا کہ فرانس کے وہ مسلمان والدین جو یہ شکایت کریں گے کہ سکول میں اساتذہ ان کے بچوں کو ‘غیر حساس کارٹون’ دکھا رہے ہیں، فرانس چھوڑ کر چلے جائیں۔
خیال رہے کہ فرانس میں پیغمبرِ اسلام کی توہین پر مبنی کارٹون دکھائے جانے پر مسلمانوں میں سخت غم و غصہ ہے اور کئی علاقوں میں شدت پسند حملے بھی ہو چکے ہیں۔
