امریکہ و روس اپنے جوہری ہتھیار کم کریں: چین

Reading Time: 2 minutes

چین نے امریکہ اور روس سے مطالبہ کیا ہے کہ دونوں عالمی طاقتیں اپنے جوہری ہتھیاروں میں مزید کمی کریں۔

چینی وزیر خارجہ وانگ ژی نے جمعے کو یہ مطالبہ امریکی صدر جو بائیڈن اور روسی صدر ولادیمیر پوتن کے جنیوا میں اجلاس میں ملاقات سے چند روز قبل سامنے آیا ہے۔
اقوام متحدہ کی حمایت سے منعقدہ تخفیف اسلحہ کی کانفرنس سے خطاب کرتے ہوئے وانگ ژی نے کہا کہ ’دونوں طاقتوں کی طرف سے تازہ کٹوتیوں سے کثیرالجہتی جوہری تخفیف اسلحہ کی حوصلہ افزائی ہوگی۔‘

انہوں امریکہ کو دبے الفاظ میں تنقید کا نشانہ بناتے ہوئے کہا کہ ’چین ایک مخصوص ملک کی جانب سے علاقائی اور عالمی میزائل دفاعی نظام کی ترقی اور تعیناتی کی مخالفت کرتا ہے جو سٹریٹجک استحکام کو مجروح کرتا ہے۔‘
ان کا کہنا تھا کہ ’چین اسی ملک کی جانب سے دوسرے ممالک کے پڑوس میں زمین سے مار کرنے والے انٹرمیڈیٹ رینج بیلسٹک میزائلوں کی تعیناتی کی مخالفت کرتا ہے۔‘

خیال رہے کہ بائیڈن انتظامیہ نے کہا ہے کہ ’امریکہ ایشیا بحرالکاہل میں چین کے بڑھتے ہوئے اثر و رسوخ اور فوجی طاقت کا مقابلہ کرنے کا ارادہ رکھتا ہے۔ چین بھی ایک جوہری طاقت ہے لیکن اس کے ایٹمی ہتھیاروں کی تعداد کافی کم ہے۔‘

امریکہ کے تخفیف اسلحہ کے سفیر رابرٹ ووڈ نے جنیوا فورم میں بات کرتے ہوئے گذشتہ بیانات کی روشنی میں چین سے مطالبہ کیا کہ ’وہ خطرے میں کمی اور سٹریٹجک استحکام کے لیے دو طرفہ بات چیت میں شامل ہو۔‘

امریکی سفیر کا کہنا تھا کہ ’آج کی تاریخ تک چین نے خطرے میں کمی اور سٹریٹجک استحکام سے متعلق باہمی بات چیت شروع کرنے کے لیے امریکی کوششوں کو مسترد کیا ہے۔‘
تاہم چینی وزیر خارجہ کا کہنا تھا کہ ’امریکہ کا یک طرفہ غلط برتاؤ ایرانی جوہری مسئلے کی بنیادی وجہ تھی۔ اس معاہدے میں واپسی کے لیے ایران پر سے پہلے پابندیاں اٹھانا فطری کام ہے۔