عمران خان کے وزرا اپوزیشن سے صلح صفائی کے خواہش مند

پاکستان کے وزیر اطلاعات فواد چوہدری اور وزیر داخلہ شیخ رشید نے اپوزیشن جماعتوں صلح صفائی کی خواہش کا اظہار کیا ہے۔

اتوار کو وزیر اطلاعات نے کہا کہ اپوزیشن کی بغیر سوچے سمجھے عدم اعتماد کی تحریک نے سیاست میں تلخیاں ہیدا کر دی ہیں۔

فواد چوہدری کا کہنا تھا کہ جمہوریت اتنی انتہائی تقسیم کا نظام نہیں اس میں کم از کم اتفاق رائے پر نظام استوار ہوتا ہے۔

انہوں نے کہا کہ وہ سمجھتے ہیں اتنی تقسیم نہ ہو کہ کسی بھی سبب گفتگو ہی مشکل ہو جائے لڑنا مشکل نہیں بعد میں صلح مشکل ہوتی ہے۔

ادھر وزیر داخلہ شیخ رشید احمد نے کوئٹہ میں میڈیا سے گفتگو کرتے ہوئے کہا ہے کہ ہمیں صلح صفائی کی طرف جانا چاہیے، یہ نہ ہو کہ 10 سال لائن میں لگے رہیں۔

ان کا کہنا تھا کہ الیکشن میں صرف ایک سال رہ گیا اس کا انتظار کرنا چاہیے، ہمیں ٹھنڈے پروگرام کی طرف جانا چاہیے۔

شیخ رشید کے مطابق اپوزیشن عدم اعتماد کی تحریک میں ناکام ہوگی مگر اس نے بعد میں بھی تنگ کیے رکھنا ہے۔