امریکہ نے نجی دورے پر آئے پاکستانی سفیر کو ملک سے نکال دیا
Reading Time: < 1 minuteامریکی حکام کی جانب سے ایک پاکستانی سفارتکار کو ملک میں داخلے ہونے سے روک دیا گیا اور اُن کو لاس اینجلس ایئرپورٹ سے واپس بھیجا گیا ہے۔
اس خبر نے پاکستانی سفارتی حکام کو دُنیا بھر میں شرمندگی کا شکار کیا ہے جس کے بعد پاکستان کے دفتر خارجہ نے معاملہ امریکی حکام کے ساتھ اُٹھانے کا فیصلہ کیا۔
منگل کو پاکستان کے دفتر خارجہ نے سعودی میڈیا گروپ کے اردو نیوز کو تصدیق کی ہے کہ ترکمانستان میں تعینات پاکستانی سفیر کے کے احسن وگن کو امریکہ میں داخلے کی اجازت نہیں دی گئی اور انہیں لاس اینجلس ایئرپورٹ سے ڈی پورٹ کر دیا گیا۔
ترجمان دفتر خارجہ نے اردو نیوز کو بتایا کہ پاکستانی سفیر ایک نجی دورے پر امریکہ کے لاس اینجلس ایئرپورٹ پہنچے تھے، تاہم امریکی حکام نے انہیں داخلے سے روک دیا اور واپس بھیج دیا گیا۔
سفارتی ذرائع کے مطابق، سینیئر پاکستانی سفیر پر امریکہ میں اپنی سابقہ تعیناتی کے دوران انتظامی بدعنوانی کی شکایات تھیں، اور انہی شکایات کی بنیاد پر انہیں امریکہ میں داخل ہونے سے روکا گیا۔
اگرچہ ان کے پاس امریکی ویزا اور قانونی سفری دستاویزات موجود تھیں، لیکن اس کے باوجود انہیں داخلے کی اجازت نہیں دی گئی، جس سے یہ معاملہ مزید پیچیدہ ہو گیا ہے۔
پاکستان نے اس پیشرفت کے بعد معاملے کو سفارتی سطح پر زیرِ بحث لانے کا فیصلہ کیا ہے، تاکہ پاکستانی حکام اس فیصلے کے پیچھے اصل وجوہات جان سکیں اور مستقبل میں ایسی کسی ممکنہ صورتحال سے بچا جا سکے۔
