کوئی ایجنڈا، تحریک اور شخصیت ملکی سلامتی سے بڑی نہیں: آرمی چیف

Reading Time: 2 minutes

پاکستان کے آرمی چیف جنرل عاصم منیر نے ملک کو مزید ’ہارڈ سٹیٹ‘ بنانے کی ضرورت پر زور دیتے ہوئے دہشتگردی کا ذمہ دار گورننس میں موجود خلا کو قرار دیا ہے۔

آرمی چیف کے مطابق ’فوج اس وجہ سے قربانیاں دے رہی ہے اور دہشتگردوں کا نشانہ بن رہی ہے کہ ملک ’سافٹ سٹیٹ‘ ہے اور حکومتی طرز درست نہیں‘

منگل کو قومی سلامتی کی پارلیمانی کمیٹی کے سامنے خطاب کو حکمران اور چھوٹی اپوزیشن جماعتوں کی قیادت سُنتی رہی۔

جنرل عاصم منیر نے کہا کہ ’ملک کی سلامتی سے بڑا کوئی ایجنڈا نہیں، کوئی تحریک نہیں، کوئی شخصیت نہیں۔‘

آرمی چیف نے کہا کہ پائیدار استحکام کے لیے قومی طاقت کے تمام عناصر کو ہم آہنگی کے ساتھ کام کرنا ہو گا۔

جنرل عاصم منیر نے کہا کہ ’یہ ہماری اور ہماری آنے والی نسلوں کی بقا کی جنگ ہے۔ ہم کو بہتر گورننس اور مملکت پاکستان کو ’ہارڈ سٹیٹ بنانے کی ضرورت ہے.

ان کا کہنا تھا کہ ’ہم کب تک ایک ’سافٹ سٹیٹ‘ کے طرز پر بے پناہ جانوں کی قربانی دیتے رہیں گے۔‘

آرمی چیف نے کہ ’ہم گورننس کی وجہ سے موجود خلا کو کب تک افوج پاکستان اور شہدا کے خون سے بھرتے رہیں گے۔‘

جنرل عاصم منیر نے کہا کہ ’علما سے درخواست ہے کے وہ خوارج کی طرف سے اسلام کی مسخ شدہ تشریح کا پردہ چاک کریں۔‘

آرمی چیف کا کہنا تھا کہ ’اگر یہ ملک ہے تو ہم ہیں، لہٰذا ملک کی سلامتی سے بڑھ کر ہمارے لیے کوئی چیز نہیں۔ پاکستان کے تحفظ کے لیے یک زبان ہو کر اپنے سیاسی اور ذاتی مفادات سے بالاتر ہو کر ایک بیانیہ اپنانا ہو گا۔‘

جنرل عاصم منیر نے کہا کہ ’جو سمجھتے ہیں کہ وہ پاکستان کو ان دہشتگردوں کے ذریعے کمزور کر سکتے ہیں آج کا دن ان کو یہ پیغام دیتا ہے کہ ہم متحد ہو کر نہ صرف ان کو بلکہ ان کے تمام سہولت کاروں کو بھی ناکام کریں گے۔‘

آرمی چیف نے کہا کہ ’ہمیں اللہ تعالیٰ پر پورا بھروسہ ہے جو کچھ بھی ہو جائے انشاء اللہ ہم کامیاب ہوں گے۔‘