ذلفی بخاری کی دہری شہریت پر نوٹس

Reading Time: < 1 minute

سپریم کورٹ نے زلفی بخاری کی نااہلی کیلئے دائر درخواست پر سماعت کرتے ہوئے مقدمے میں فریق بنائے گئے افراد کو نوٹس جاری کئے ہیں ۔

دوران سماعت چیف جسٹس نے پوچھا کہ یہ بتائیں زلفی بخاری کس عہدے پر ہیں؟ عدالت کو بتایا گیا کہ زلفی بخاری وزیر اعظم کے معاون خصوصی ہیں ۔

درخواست گزار وکیل نے کہا کہ کیا ایک عام آدمی دہری شہریت کی بنیاد پر وزیر بن سکتا ہے ۔ چیف جسٹس نے پوچھا کہ کیا آپ یہ کہنا چاہتے ہیں دہری شہرت کا حامل شخص رکن اسمبلی نہیں بن سکتا تو وزیر بھی نہیں بن سکتا ۔

چیف جسٹس نے کہا کہ میرے خیال سے آپ آرٹیکل 62 ون سی کے تحت درخواست لے کر آئے ہیں ۔ وکیل نے کہا کہ جو کام بالواسطہ نہیں ہوسکتا وہ بلاواسطہ بھی نہیں ہوسکتا ۔

عدالت نے زلفی بخاری کیخلاف درخواست پر فریق بنائے گئے عمران خان و دیگر کو نوٹس جاری کرتے ہوئے کیس کی سماعت جمعہ تک ملتوی کر دی ۔