مصنوعی ٹانگ لگنے پر بچے کا ڈانس
افغانستان میں بارودی سرنگ کے دھماکے میں ٹانگ کھونے والے معصوم بچے کی مصنوعی ٹانگ لگنے کے بعد ڈانس کی ویڈیو سوشل میڈیا پر وائرل ہو گئی ہے ۔
افغانستان میں عالمی ریڈ کراس کے آرتھوپیڈک سنٹر میں چھ سالہ احمد کو مصنوعی ٹانگ لگائی گئی جس کے بعد بچے نے تاجک ڈانس چھک چھک کیا ۔
افغان خاتون رویا موساوی نے ٹوئٹر پر احمد کی ڈانس ویڈیو شیئر کرتے ہوئے لکھا ہے کہ مصنوعی ٹانگ لگنے پر معصوم خوشی کے جذبات کا اظہار رقص کے ذریعے کر رہا ہے ۔
ٹویٹ میں انہوں نے لکھا ہے کہ احمد نے افغانستان کے صوبہ لوگر میں ایک بارودی سرنگ دھماکے میں اپنی ٹانگ کھوئی ۔ ”مصنوعی ٹانگ کے بعد اس کی زندگی بدل گئی اور وہ اس کی خوشی دیدنی ہے۔“
اس ویڈیو کو اب تک 44 ہزار افراد نے دیکھا ہے ۔
اس ویڈیو پر 62 صارفین نے تبصرے کیے ہیں جن میں ریڈ کراس کو سراہا گیا ہے ۔
پاکستانی ٹوئٹر صارف ثمر من اللہ نے بھی اس ویڈیو کو پوسٹ کیا ہے تاہم تاجک ڈانس کو پشتو ڈانس اتنڑ کے ساتھ ملانے پر ان کو تبصرہ کرنے والوں نے تنقید کا نشانہ بھی بنایا ہے ۔
