فیس بک معطلی کے بعد بحال
دنیا بھر میں سماجی رابطوں کی مقبول ترین ویب سائٹ فیس بک کی سروس معطل ہونے سے کروڑوں صارفین کو رابطوں میں مشکلات کا سامنا رہا۔ سروس تین گھنٹے معطلی کے بعد بحال ہو گئی ہے۔
اتوار کو دنیا بھر میں فیس بک اور انسٹاگرام کی سروس اچانک ڈاؤن ہوگئی جس کے بعد صارفین کو لاگ ان کرنے اور سروس استعمال کرنے میں مشکلات کا سامنا کرتے رہے۔
فیس بک سماجی رابطوں کے لیے دنیا کی سب سے بڑی کمپنی سمجھی جاتی ہے جس کے صارفین کی تعداد پونے تین ارب کے لگ بھگ ہے جبکہ اس کمپنی کی دیگر ویب سائٹس اور ایپ یعنی انسٹاگرام اور واٹس ایپ استعمال کرنے والوں کی تعداد بھی ایک سو کروڑ سے زائد ہے۔
تاحال فیس بک کی جانب سے سروس معطلی پر کوئی باضابطہ بیان جاری نہیں کیا گیا۔
فیس بک کے ٹوئٹر اکاؤنٹ نے بھی اس بارے میں کوئی تفصیلات جاری نہیں کیں۔ خیال رہے کہ فیس بک کے ٹوئٹر اکاؤنٹ کو دنیا میں ایک کروڑ 35 لاکھ افراد فالو کرتے ہیں۔
ٹوئٹر صارفین نے فیس بک کی سروس معطلی پر ٹریںڈ چلا کر تبصرے شروع کیے ہیں جن میں زیادہ تر افراد کہہ رہے ہیں کہ چونکہ فیس بک بند ہے تو وہ دوبارہ ٹوئٹر کا چکر لگانے آئے ہیں۔
