سلیمانی کی تدفین، بھگدڑ میں 40 ہلاک
Reading Time: < 1 minuteامریکی ڈرون حملے میں مارے گئے ایرانی جنرل قاسم سلیمانی کی تدفین کے دوران ہجوم میں بھگدڑ مچ گئی جس میں کم از کم 40 ہلاک سینکڑوں افراد زخمی ہوئے ہیں۔
قاسم سلیمانی کی تدفین آج ان کے آبائی شہر کرمان میں ہو رہی ہے جس میں لاکھوں افراد شریک ہیں۔ ایران کے سرکاری ٹی وی کے مطابق لاکھوں کے ہجوم میں بھگدڑ مچنے سے افسوس ناک حادثہ پیش آیا۔
سپاہ پاسداران انقلاب اسلامی کے کمانڈر جنرل قاسم سلیمانی کا جسد خاکی اہواز، مشہد، تہران اور قم کے بعد ان کے آبائی شہر کرمان پہنچایا گیا ہے۔
اس موقع پر ایئر پورٹ پر ایران کے اعلی حکام اور سیاسی و عسکری شخصیات اورعوام کی بڑی تعداد موجود تھی۔ کرمان میں لوگوں کی بڑی تعداد ہاتھوں میں لال پرچم لیے جنازے میں شریک ہے۔
تہران میں قاسم سلیمانی کی نماز جنازہ ایرانی سپریم لیڈر آیت اللہ علی خامنائی نے ادا کی جس میں صدر حسن روحانی، چیف جسٹس ابراہیم رئیسی، پارلیمان کے سپیکر علی لاریجانی، قدس فورس کے نئے کمانڈر اسماعیل قانی سمیت اعلیٰ حکام نے شرکت کی۔
