انڈیا: کورونا سے مرنے والوں کی لاشیں گڑھے میں

Reading Time: < 1 minute

انڈیا میں کورونا سے مرنے والے افراد کی لاشیں گڑھے میں پھینکے جانے پر سخت ردعمل سامنے آیا ہے اور حکومت نے لواحقین سے معافی مانگی ہے۔

لاشیں گڑھے میں پھینکنے کا واقعہ ریاست کرناٹک میں پیش آیا جس کی ویڈیو سوشل میڈیا میں وائرل ہوئی تو ہزاروں افراد نے ریاست کے حکام کو سخت تنقید کا نشانہ بنایا۔

انڈیا میں گزشتہ روز کورونا سے ایک دن میں 500 افراد ہلاک ہوئے۔

کرناٹک کے بیلاری علاقے میں آٹھ افراد کی لاشوں کو جس طرح ٹھکانے لگایا گیا اس نے شہریوں کی جانب سے شروع کی گئی اس بحث کو پھر سے تازہ کر دیا ہے کہ میتوں کی بے حرمتی کی جا رہی ہے۔

ویڈیو وائرل ہونے کے بعد ریاست کرناٹک کی حکومت نے اس میں شریک فیلڈ ٹیم پر پابندی لگا دی ہے اور حکومت نے مرنے والوں کے لواحقین سے معافی بھی مانگی ہے۔

کانگریس کے رہنما ڈی کے شیو کمار نے اس ویڈیو کو ٹویٹ کیا اور لکھا کہ یہ غیر انسانی ہے جس پر سرکاری عملہ تیزی کے ساتھ حرکت میں آیا۔

نائب کمشنر اور ضلع مجسٹریٹ ایس ایس نکول نے ایک بیان میں کہا ہے کہ ویڈیو کی جانچ کرنے پر پتا چلا کہ یہ واقعہ بیلاری کا ہے جہاں آٹھ افراد کورونا سے ہلاک ہو گئے تھے۔

انڈیا میں کورونا سے متاثرہ افراد کی مجموعی تعداد پانچ لاکھ 80 ہزار سے زائد ہو چکی ہے جبکہ مرنے والوں کی تعداد 17 ہزار 400 سے زیادہ ہے۔