سارے امریکیوں کا صدر ہوں، جو بائیڈن کا جیت پر اعلان

Reading Time: < 1 minute

امریکی میڈیا نے صدارتی الیکشن میں ڈیموکریٹ امیدوار جو بائیڈن کی جیت کا اعلان کر دیا ہے جبکہ ڈونلڈ ٹرمپ نے اس کو جھوٹ قرار دیتے ہوئے عدالت جانے کا کہا ہے۔

امریکی خبر رساں ادارے ایسوسی ایٹڈ پریس (اے پی) اور امریکی ٹی وی چینلز کے مطابق ڈیمو کریٹ امیدوار جو بائیڈن صدر منتخب ہو گئے ہیں۔

اے پی کے مطابق انہوں نے الیکٹورل کالج کے 284 ووٹ حاصل کر لیے ہیں۔ دنیا بھر سے جو بائیڈن کو کامیابی کے بعد مبارکباد کے پیغامات موصول ہو رہے ہیں۔

اے ایف پی کے مطابق برطانوی وزیراعظم بورس جانسن اور کینیڈین وزیراعظم جسٹن ٹروڈو نے جو بائیڈن کو امریکہ کا صدر منتخب ہونے پر مبارکباد دی ہے۔

جب امریکی میڈیا نے خبر دی کہ ریاست پنسلوینیا میں ووٹوں کی گنتی مکمل ہو گئی جس میں جو بائیڈن کامیاب قرار پائے، تو بائیڈن نے شکریے اور خوشی کا ٹویٹ کرتے ہوئے لکھا کہ وہ تمام امریکیوں کے صدر بنیں گے اور درپیش مشکل چیلنجز کا سامنا کریں گے۔

دوسری جانب ٹرمپ نے اس کو جھوٹ قرار دیتے ہوئے عدالت جانے کا اعلان کیا ہے۔