غزہ سے نقل مکانی ناقابلِ قبول، فلسطینی ریاست کے بغیر اسرائیل سے تعلقات ناممکن: سعودی عرب
Reading Time: < 1 minuteسعودی عرب نے ولی عہد شہزادہ محمد بن سلمان کے مؤقف کو ایک مرتبہ پھر دہراتے ہوئے کہا ہے کہ مملکت کا طویل مدت سے یہی نظریہ ہے کہ فلسطینیوں کی ایک خودمختار ریاست ہونی چاہیے اور یہ ایک پختہ مؤقف ہے جس پر مذاکرات ممکن نہیں ہیں۔
سعودی پریس ایجنسی (ایس پی اے) کے مطابق صدر ڈونلڈ ٹرمپ کے غزہ کو امریکی ’ملکیت‘ میں لینے اور فلسطینیوں کو اپنی زمین سے بے دخل کرنے سے متعلق بیان کے کچھ دیر بعد سعودی وزارت خارجہ نے بیان جاری کیا۔
مملکت اور اس کے رہنماؤں کا طویل مدت سے یہی مؤقف رہا ہے اور وہ بارہا فلسطینیوں کے لیے انصاف کا مطالبہ کرتے آئے ہیں، ان کے بقول دہائیوں سے جاری تنازعے کے پائیدار حل کے طور پر اسرائیل کے ساتھ فلسطینی اپنی ریاست کے مستحق ہیں۔
سعودی رہنماؤں نے بارہا کہا ہے کہ مملکت اور اسرائیل کے درمیان رسمی تعلقات کا انحصار 1967 کی سرحدوں کے مطابق ایک قابل عمل فلسطینی ریاست کے قیام پر ہے۔
وزارت خارجہ کے بیان میں سعودی ولی عہد شہزادہ محمد بن سلمان کے 18 ستمبر 2024 کو شوریٰ کونسل سے خطاب کا حوالہ دیا گیا ہے جس میں انہوں نے کہا تھا کہ سعودی عرب خومختار فلسطینی ریاست جس کا دارالحکومت مشرقی یروشلم ہو، کے قیام کے لیے انتھک کوششیں جاری رکھے گا اور اس کے بغیر اسرائیل سے تعلقات کو معمول پر نہیں لائیں گے۔
سعودی ولی عہد نے 11 نومبر 2024 کو ریاض میں ہونے والی عرب اسلامی سربراہی کانفرنس میں بھی انہی جذبات کا اظہار کیا تھا اور فلسطینی ریاست کے قیام کے لیے کوششیں جاری رکھنے پر زور دیتے ہوئے فلسطینی علاقوں پر اسرائیلی قبضہ ختم کرنے کا مطالبہ کیا تھا۔
