وزیراعظم کے ترقیاتی فنڈز دینے پر سپریم کورٹ کا نوٹس

Reading Time: < 1 minute

سپریم کورٹ کے جسٹس قاضی فائز عیسیٰ نے وزیراعظم کی جانب سے ارکان قومی اسمبلی کو ترقیاتی فنڈز دینے کا نوٹس لیا ہے۔

سپریم کورٹ نے بدھ کو  چاروں صوبوں کے ایڈووکیٹ جنرل اور اٹارنی جنرل کو نوٹس جاری کرتے ہوئے مؤقف طلب کیا۔

جسٹس قاضی فائز عیسٰی نے نوٹس اطلاعات پر نوٹس لیا جن میں بتایا گیا تھا کہ وزیراعظم عمران خان نے تحریک انصاف اور اتحادی جماعتوں کے قومی اسمبلی کے ارکان کو 50 کروڑ کے فنڈز جاری کرنے کا اعلان کیا ہے۔

جسٹس قاضی فائز عیسیٰ کی سربراہی میں دو عدالتی رکنی بینچ نے ایک مقدمے کی سماعت کے دوران نوٹس لیا۔

جسٹس قاضی فائز عیسیٰ نے سوال کہ کیا وزیراعظم کا ترقیاتی فنڈز دینا آئین، قانون اور عدالتی فیصلوں کے مطابق ہے، اٹارنی جنرل حکومت سے ہدایات لے کر عدالت کو آگاہ کریں۔

جسٹس قاضی فائز عیسیٰ نے کہا کہ اگر یہ ترقیاتی فنڈز آئین قانون کے مطابق ہوئے تو یہ معاملہ ختم کردیں گے، فنڈز کا اجرا آئین کے مطابق نہ ہوا تو کارروائی ہوگی۔

جسٹس قاضی فائز عیسیٰ نے معاملے پر عدالتی کارروائی کے لیے بینچ تشکیل دینے کے لیے چیف جسٹس کو لکھا۔

اٹارنی جنرل خالد جاوید خان نے کہا کہ میں حکومت سے ہدایات لے کر عدالت کو آگاہ کروں گا، جو بھی کام ہوگا وہ قانون، آئین اور عدالتی فیصلوں کی روشنی میں ہوگا۔

کیس کی سماعت آئندہ بدھ تک ملتوی کردی گئی۔