فٹیف سیاسی مقاصد کے لیے تو استعمال نہیں ہو رہا: وزیر خارجہ

Reading Time: 2 minutes

پاکستان کے وزیرخارجہ شاہ محمود قریشی نے کہا ہے کہ بعض قوتیں چاہتی ہیں کہ پاکستان پر ایف اے ٹی ایف کی تلوار لٹکی رہے، دیکھنا ہوگا کہ کہیں ایف اے ٹی ایف سیاسی مقاصد کے لیے تو استعمال نہیں ہو رہا؟ تمام نکات پر عمل کے باوجود پاکستان کو گرے لسٹ میں رکھنے کا کوئی جواز نہیں، منی لانڈرنگ اور دہشت گردی کی مالی معاونت روکنے سمیت ملکی مفاد میں اقدامات جاری رکھیں گے۔

سنیچر کو وزیر خارجہ شاہ محمود قریشی نے ایف اے ٹی ایف کے حوالے سے بیان میں کہا کہ یہ تعین کرنا ہوگا کہ ایف اے ٹی ایف ایک تکنیکی فورم ہے یا پولیٹیکل فورم ہے، کہیں اس فورم کو سیاسی مقاصد کے لیے تو استعمال نہیں کیا جا رہا؟

وزیر خارجہ نے کہا جہاں تک تکنیکی پہلوؤں کا تعلق ہے تو ہمیں 27 نکات دیے گئے، وہ خود تسلیم کر رہے ہیں کہ 27 میں سے 26 نکات پر ہم نے مکمل عملدرآمد کر لیا ہے، ستائیسویں نکتے پر بھی کافی حد تک پیش رفت ہو چکی ہے اور مزید کرنے کا ارادہ رکھتے ہیں۔

شاہ محمود قریشی نے کہا کہ ان کی نظر میں ایسی صورت حال میں پاکستان کو گرے لسٹ میں رہنے اور رکھنے کی کوئی گنجائش نہیں بنتی، بعض قوتیں یہ چاہتی ہیں کہ پاکستان کے سر پر تلوار لٹکتی رہے۔

وزیر خارجہ نے کہا کہ پاکستان نے جو بھی اقدامات اٹھائے وہ اپنے مفاد کو پیش نظر رکھتے ہوئے اٹھائے، یہ ہمارا قومی مفاد ہے کہ منی لانڈرنگ نہیں ہونی چاہیے،
پاکستان کی منشا یہ ہے کہ ہم نے دہشت گردی کی مالی معاونت کا تدارک کرنا ہے، جو بات پاکستان کے مفاد میں ہے وہ ہم کرتے رہیں گے۔

خیال رہے کہ منی لانڈرنگ اور ٹیرر فنانسنگ کے انسداد کے عالمی ادارے ایف اے ٹی ایف نے گزشتہ روز پاکستان کو مزید چار ماہ تک گرے لسٹ میں رکھنے کا فیصلہ سنایا تھا۔