امریکہ و یورپ کے دباؤ کا مقابلہ، روس اور چین میں معاہدے

Reading Time: 2 minutes

روس اور چین نے امریکہ و یورپ کے دباؤ کا مقابلہ کرنے کے لیے تجارت و دفاعی تعاون کے درجن بھر معاہدوں پر دستخط کیے ہیں.

صدر ولادیمیر پوتن کے دورہ چین کے موقع پر دونوں ملکوں کے مابین تعاون کے غیر معمولی معاہدوں پر دستخط کیے گئے اور دوستی و شراکت داری کو حدود سے ماورا قرار دیا گیا ہے۔

دونوں ملکوں کی جانب سے جاری کیے گئے تفصیلی مشترکہ اعلامیے میں بتایا گیا کہ ’دونوں ملکوں کے درمیان دوستی کی کوئی حدود نہیں، اسی طرح تعاون کے لیے کوئی ممنوع شعبہ بھی نہیں۔‘

روسی صدر کا دورہ انتہائی اہم اور معنی خیز ہے کیونکہ اس وقت چین اولمپکس کی میزبانی کر رہا ہے جس کا امریکہ نے سفارتی طور پر بائیکاٹ کر رکھا ہے۔

جمعے کو صدر پوتن نے چین کے ساتھ 117 ارب ڈالر مالیت کا تیل اور گیس کی ترسیل کا معاہدہ بھی کیا۔

خیال رہے کہ روس پہلے ہی چین کو گیس سپلائی کرنے والا تیسرا بڑا ملک ہے۔

تجزیہ کاروں کے مطابق دونوں ممالک انسانی حقوق اور بعض دیگر معاملات پر مغرب کی جانب سے دباؤ کے نتیجے میں ایک دوسرے کے قریب آ گئے ہیں۔

مشترکہ اعلامیے میں دونوں ممالک نے مغرب کی جانب سے شدید دباؤ پر پہلے کی نسبت ایک دوسرے کی زیادہ مدد و تعاون کے عزم کا اظہار کیا۔

روس نے چین کی جانب سے تائیوان کو اپنا حصہ قرار دینے کے موقف پر اس کو سپورٹ کیا اور اس جزیرے کی کسی بھی ممکنہ صورت میں آزادی کی مخالفت کی۔

ماسکو اور بیجنگ نے آکاس (AUKAS) اتحاد کی مخالفت میں بھی آواز اٹھائی، جس میں آسٹریلیا، برطانیہ، امریکہ شامل ہیں۔ آکاس کے بارے میں چین اور روس کا کہنا ہے کہ اس نے خطے میں ہتھیاروں کی دوڑ میں اضافہ کیا۔

اسی طرح چین روس کے اس مطالبے میں بھی شامل ہوا کہ نیٹو کو مزید بڑھانے کا سلسلہ ختم کیا جائے اور مغرب سے تحفظ کی ضمانت کے مطالبے کی بھی حمایت کی۔