آسٹریلیا کے سابق کرکٹر اینڈریو سائمنڈز ٹریفک حادثے میں ہلاک

Reading Time: < 1 minute

آسٹریلیا کے سابق کرکٹر اینڈریو سائمنڈز ٹریفک حادثے میں ہلاک ہو گئے۔ ان کی گاڑی کوئین سلینڈ کے علاقے ٹاؤنزول میں حادثے کا شکار ہوئی۔

آسٹریلوی ذرائع ابلاغ کے مطابق واقعے کو حال ہی میں شین وارن کے انتقال کے بعد سپورٹس کے لیے بڑا دھچکا سمجھا جا رہا ہے اور لوگ واقعے پر افسوس کا اظہار کر رہے ہیں۔

46 سالہ کھلاڑی نے اپنے کیریئر کے دوران 26 ٹیسٹ اور 198 ون ڈے میچز کھیلے۔

سائمنڈز ایک جارحانہ بلے بازتھے جو اپنی بہترین فیلڈنگ کے لیے بھی بہت مشہور رہے۔

اینڈریو سائمنڈز نے 2006 اور 2007 میں ایشز سیریز کے دوران انگلینڈ کے خلاف آسٹریلیا کی نمائندگی کی تھی۔

سائمنڈز برطانیہ کے شہر برمنگھم میں پیدا ہوئے اور انہوں نے سکول کے دنوں میں کرکٹ کھیلنا شروع کر دی تھی، وہ بہت جلد کرکٹ کلبز کی نظر میں آئے اور انگلینڈ کاؤنٹی کرکٹر کلبز کے علاوہ لنکا شائر اور سرے سے بھی کاؤنٹی کرکٹ کھیلی۔

اینڈریو کاؤنٹی میں سب سے زیادہ چھکے مارنے کا ریکارڈ بھی رکھتے تھے۔

انہوں نے 1995 مورگن کے خلاف گلوسیٹر شائر کی طرف سے کھیلتے ہوئے 16 چھکے لگائے تھےان کا یہ ریکارڈ 29 سال بعد پچھلے ہفتے بین سٹوکس نے توڑا۔

پولیس کا کہنا ہے کہ حادثہ سنیچر کی رات کو پیش آیا۔ ان کی گاڑی تیز رفتاری کے باعث الٹ گئی، حادثے کے بعد مقامی ایمرجنسی اہلکاروں نے ان کو بچانے کی کوشش تاہم جانبر نہ ہو سکے۔

سابق آسٹریلوی کرکٹر جیسن گیلیپسے نے ٹویٹ میں اینڈریو کی تصویر شیئر کرتے ہوئے لکھا ’ایک ہولناک خبر، ہم آپ کو بہت یاد کریں گے۔‘

سابق کھلاڑی اور کمنٹیٹر ایڈم گلکریسٹ نے لکھا ’یہ واقعی بہت تکلیف دہ ہے۔‘

اسی طرح پاکستانی فاسٹ بولر شعیب اختر نے ان کی تصویر شیئر کرتے ہوئے لکھا کہ وہ بہت غمگین ہیں۔