آئی سی سی کی درجہ بندی، پاکستانی کپتان بابراعظم بدستورسرفہرست

Reading Time: 2 minutes

انٹرنیشنل کرکٹ کونسل (آئی سی سی) نے کھلاڑیوں کی رینکنگ جاری کردی ہے۔ٹیسٹ ،ون ڈے اور ٹی ٹوئنٹی میں مردکھلاڑیوں کی درجہ بندی جاری کی گئی ہے۔

جاری کردہ ون ڈے درجہ بندی کے مطابق بیٹنگ میں پاکستان کے بابراعظم کی پہلی پوزیشن برقرار ہے جب کہ امام الحق دوسرے نمبر پر موجود ہیں، آسٹریلیا کے ڈیوڈ وارنر ایک درجہ ترقی کے بعد نویں نمبر پر آگئے۔

آئی سی سی بولرز کی ون ڈے درجہ بندی میں نیوزی لینڈ کے ٹرینٹ بولٹ کا پہلا نمبر برقرار ہے جب کہ انگلینڈ کےکرس ووکس دوسرے اور نیوزی لینڈ کے ہی میٹ ہنری کا تیسرا نمبر ہے، پاکستان کے فاسٹ بولر شاہین آفریدی اس فہرست میں چوتھے نمبر پر موجود ہیں۔

ون ڈے آل راؤنڈرز میں بنگلادیش کے شکیب الحسن کا پہلا نمبر ہے جب کہ پاکستان کے عماد وسیم اس فہرست میں نویں نمبر پر موجود ہیں۔

آئی سی سی ٹیسٹ رینکنگ میں بلے بازوں کی فہرست میں انگلینڈ کے جوروٹ پہلے نمبر پر برقرار ہیں جب کہ آسٹریلیا کے مارنس لبوشین کا دوسرا اور اسٹیو اسمتھ کا تیسرا نمبر ہے، پاکستان کے بابر اعظم چوتھے نمبر پرموجود ہیں۔

ٹیسٹ بولنگ میں آسٹریلوی کپتان پیٹ کمنز کا پہلا نمبر برقرار ہے، بھارت کے روی چندرن ایشون کا دوسرا اور جسپریت بمرا کا تیسرا نمبر ہے، پاکستان کے فاسٹ بولر شاہین آفریدی کا رینکنگ میں چوتھا نمبر ہے۔

رینکنگ میں ویسٹ انڈیز کے کیمار روچ 4 درجے بہتری کے ساتھ 8 ویں نمبر پر آگئے ہیں، ٹیسٹ آل راؤنڈرز میں بھارت کے رویندرا جڈیجا کا پہلا نمبر برقرار ہے، بنگلادیش کے شکیب الحسن دو درجے ترقی کے بعد دوسرے نمبر پر آگئے ہیں، پاکستان کا کوئی آل راؤنڈر اس فہرست میں پہلے دس کھلاڑیوں میں جگہ نہیں بناسکا۔

آئی سی سی ٹی ٹوئنٹی رینکنگ میں بھی پاکستان کے بابر اعظم کا پہلا نمبر ہے، محمد رضوان کی بھی رینکنگ میں دوسری پوزیشن برقرار ہے۔

بولرز میں آسٹریلیا کے جوش ہیزل ووڈ کی پہلی پوزیشن برقرار ہے، انگلینڈ کے عادل رشید دوسرے اور جنوبی افریقا کے تبریز شمسی تیسرے نمبر پر موجود ہیں،سری لنکا کے وانندو ہسارنگا ایک درجے ترقی کے بعد چھٹے نمبرپر آگئے ہیں جب کہ کوئی پاکستانی بولرز پہلے دس کھلاڑیوں کی فہرست میں جگہ نہیں بناسکا۔

ٹی ٹوئنٹی آل راؤنڈرز میں افغانستان کے محمد نبی کا پہلا نمبر ہے اور بنگلادیش کے شکیب الحسن دوسرے نمبر پر موجود ہیں۔