اہم خبریں متفرق خبریں

فلپائن کے آرمی چیف فوج کو سیاست سے دور رکھنے کی کوشش کے دوران عہدے سے برطرف

جنوری 8, 2023 2 min

فلپائن کے آرمی چیف فوج کو سیاست سے دور رکھنے کی کوشش کے دوران عہدے سے برطرف

Reading Time: 2 minutes

ایشیائی ملک فلپائن کے صدر نے غیر متوقع طور پر فوج کے سربراہ کو برطرف کرتے ہوئے عنقریب ریٹائر ہونے والے جنرل کو ان کی جگہ آرمی چیف تعینات کر دیا ہے۔

ایسوسی ایٹد پریس کے مطابق صدر فرڈینینڈ مارکوس نے بغیر وضاحت پیش کیے تمغہ شجاعت سے نوازے گئے لیفٹینٹ جنرل بارتولوم بکارو کو عہدے سے برطرف کر کے ان کی جگہ آئندہ ماہ ریٹائر ہونے والے لیفٹینینٹ جنرل ایندرے سینٹیو کو نیا آرمی چیف مقرر کر دیا ہے۔

کئی سینیئر جنریلوں کو نظرانداز کرتے ہوئے لیفٹینینٹ جنرل ایندرے کو فوج کا سربراہ مقرر کرنے کے بعد ان کی مدت ملازمت میں تین سال کی توسیع کر دی گئی ہے۔

فلپائن کے صدر نے پانچ ماہ قبل ہی بارتولوم بکارو کو آرمی چیف تعینات کیا تھا اور ان کی تین سال کی مدت اگست 2025 میں ختم ہونا تھی۔

فلپائن میں فوج کے سربراہ کی تعیناتی ایک حساس معاملہ ہے اور فوج کی طرف سے ناکام بغاوت، بدعنوانی کے سکینڈلز اور انسانی حقوق کی خلاف ورزیوں کی ایک تاریخ رہ چکی ہے۔

گزشتہ کئی برس سے فلپائن میں فوج کو ایک پروفیشنل ادارہ اور سیاست سے دور رکھنے کی کوشش جاری ہے۔

گزشتہ برس فلپائن میں نئے قانون کی منظوری دی گئی تھی جس کے تحت آرمی چیف کو تین سال کے لیے مقرر کیا جائے گا تاکہ وہ ادارے میں اصلاحات متعارف کرا سکیں۔

ملکی روایت برقرار رکھتے ہوئے کمان کی تبدیلی کی تقریب سنیچر کو ملٹری کیمپ میں منعقد ہوئی جس میں بارتولوم بکارو نے اپنےعہدے کی ذمہ داریاں نئے فوجی سربراہ لیفٹینینٹ جنرل سینٹیو کو سونپ دیں۔

اس موقع پر سبکدوش ہونے والے بارتولوم بکارو نے فوج، اپنے اہل خانہ اور صدر کا شکریہ ادا کیا تاہم صدر فرڈینینڈ مارکوس کی جگہ ان کے قریبی مشیر تقریب میں شریک ہوئے۔

صدارتی دفتر کے اعلٰی ترین افسر صدر فرڈینینڈ مارکوس کے ایگزیکٹو سیکریٹری لوکس برسامن نے تقریب سے خطاب میں کہا کہ وہ فوجی کمان میں منتقلی کے ہموار عمل سے انتہائی متاثر ہوئے ہیں جو سیاستدانوں کو بھی اپنانا چاہیے تاکہ انتخابات کے بعد بدامنی کی فضا نہ پیدا ہو۔

انہوں نے صدر کا پیغام سناتے ہوئے کہا کہ انہوں نے صدارتی مشیروں کو ہدایت کی ہے کہ وہ برطرف ہونے والے آرمی چیف کی میدان جنگ میں حاصل کی گئی کامیابیوں کا انتہائی احترام کریں۔

Array

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے