جہاز کے واش رومز خراب، پرواز دو گھنٹے کی اُڑان کے بعد واپس

Reading Time: < 1 minute

آسٹرین ایئرلائنز کے ایک جہاز کو واش رُومز خراب ہونے کے باعث ویانا سے نیویارک جانے والی پرواز کے دو گھنٹے بعد ہی واپس آنا پڑ گیا۔

خبر رساں ایجنسی اے ایف پی کے مطابق ویانا سے نیو یارک کے لیے روانہ ہونے والی فلائٹ کے عملے کو دو گھنٹے بعد علم ہوا کہ طیارے کے آٹھ میں سے پانچ واش رُومز خراب ہیں۔

بوئنگ 777 کی اس پرواز میں تقریباً 300 مسافر سوار تھے اور اس کا دورانیہ آٹھ گھنٹے پر محیط تھا۔

ایئرلائن کی ایک ترجمان نے اے ایف پی کو بتایا کہ ’جہاز کے عملے کو دوران پرواز تکنیکی خرابی کے بارے میں معلوم ہوا۔‘

’تکنیکی خرابی کی وجہ سے واش رُومز کا فلش سسٹم ٹھیک طرح سے کام نہیں کر رہا تھا تو اس کے بعد پرواز کو واپس ویانا موڑنے کا فیصلہ کیا گیا۔‘

ترجمان نے بتایا کہ ’ان کی اطلاع کے مطابق اس سے قبل آسٹریوی ایئرلائنز کی فلائٹ میں اس قسم کا مسئلہ کبھی سامنے نہیں آیا۔‘

ایئرلائن کی ترجمان کا مزید کہنا تھا کہ ’جہاز کی تکنیکی خرابی دُور کر دی گئی ہے اور اس کی پروازوں کا سلسلہ دوبارہ شروع ہو چکا ہے۔‘

واضح رہے کہ آسٹرین ایئرلائنز کی اس پرواز میں خرابی کے بعد مسافروں کو ویانا سے دوسری پروازوں کے ذریعے اُن کی منزل پر پہنچایا گیا۔